Монголын боксын холбооны Удирдах зөвлөлийн гишүүд Гавьяат тамирчин Э.Цэндбаатарын гаргасан хүсэлтийн дагуу ДАШТ-д “Алдар” спорт хорооны тамирчин О.Тулгатай халз өрсөлдүүлэн, ялсныг нь явуулахаар шийдвэрлэсэн билээ. Харин Э.Цэндбаатар тухайн өдөр эрүүл мэндийн үзлэгтээ хамрагдаагүй тул сорил тэмцээн цуцлагдаж, О.Тулга ДАШТ-д явахаар болсон юм.

       МУГТ Э.Цэндбаатарыг огцом жин хассанаас болж эмнэлэгт хүргэгдсэн гэх мэдээлэл ч бий.  Бид энэ талаар түүний ээжээс тодруулахад “Хүү минь эхнэр, хүүхэдтэйгээ хамт өөр газар байгаа учраас ямар шалтгааны улмаас сорилго тэмцээндээ оролцоогүйг нь мэдэхгүй. Уг нь өчигдөр ярихдаа “Бие маань сонин болоод байна. Орой 20:00 цаг хүртэл харзнаж үзье. Зүгээр байвал 20:00 цаг гээд Эрдэнэт явна” гэж байсан. Ямар нэг дарамт, шахалт байгаагүй байх гэж бодож сууна. Бие нь өвдсөн байх л гэж бодож байгаа. Өчигдөр түргэн дуудаж үзүүлсэн. Бие нь өвдсөн үед сэтгэл байгаад Дэлхий аваргад орж чадах биш дээ” гэсэн билээ.

     Харин боксын зарим тамирчин Э.Цэндбаатарыг архи ууснаас болж бэлтгэлээ хийгээгүй, жиндээ орж чадаагүй хэмээгээд байгаа юм.

Бид Э.Цэндбаатартай утсаар холбогдож, юу болсон талаар тодруулах гэсэн боловч “Одоохондоо ярилцлага өгөх болоогүй байна. Миний бие зүгээр, сайн байгаа” хэмээж, өөр мэдээлэл өгөхөөс татгалзлаа.

       Тэрбээр сорил болдог өдөр буюу аравдугаар сарын 3-нд цахим хуудастаа “60 кг бол миний үндсэн жин. Жиндээ орох асуудалгүй байлаа. Сөгдөж мөргөж гуйсан. Тиймдээ ч бэлтгэлээ маш сайн хийсэн. Жиндээ орсон. Гэхдээ л бүх зүйл санаснаар болсонгүй. Намайг дэмжсэн бүх хүмүүст баярлалаа” хэмээн бичсэн билээ.