Улсын төсвийн хөрөнгө оруулалтаар хэрэгжсэн Өвөрхангай аймгийн Бат-Өлзий сумын Орхон голын Онгоцтойн амны 220 метр, Цагаан голын 30 метр урт төмөрбетон гүүр, 6.3 км хайрган хучилттай автозамын барилга энэ сарын 24-нд ашиглалтад оржээ. Төмөр бетон гүүрний инженерийн нарийвчилсан зураг төслийг “ГБЭТ” ХХК боловсруулсан бөгөөд барилгын ажлын гүйцэтгэгчээр “Мотор сервис” ХХК, техник технологийн хяналтын зөвлөхөөр “Зам тээврийн хөгжлийн төв” ТӨҮГ-ын хяналтын баг ажилласан байна. 

    Зам, гүүрний бүтээн байгуулалтын ажлыг 2019-2021 онд хийж гүйцэтгэхээр төлөвлөж, гүйцэтгэгч байгууллага 8.6 тэрбум төгрөгийн өртгөөр гэрээнд заасан хугацаандаа ажлыг бүрэн дуусгаж ашиглалтад оруулжээ. Зам, гүүрний хөдөлгөөн нээх ёслолд Зам, тээврийн хөгжлийн дэд сайд Ж.Бат-Эрдэнэ, УИХ-ын гишүүд, орон нутгийн удирдлага, ард иргэдийн төлөөлөл болон гүйцэтгэгч компани, хяналтын зөвлөх баг оролцсон байна.