Төрийн ордонд “Цар тахлын үеийн эдийн засгийн сэргэлтийг эрчимжүүлэх нь” зөвлөлдөх уулзалт болж байна. Ерөнхийлөгчийн санаачлан, зохион байгуулж буй тус зөвлөлдөх уулзалтад төр, хувийн хэвшил, хөрөнгө оруулагчид оролцож байгаа аж. Дээрх уулзалтад Монгол Улсын Ерөнхий сайд Л.Оюун-Эрдэнэ оролцож реформын шинжтэй өөрчлөлт, төлөвлөлтийн талаар танилцуулах бол УИХ-ын дарга Г.Занданшатар ирэх намрын чуулганаар өөрчлөлт оруулах хуулийн төслийн талаарх эрх зүйн шинэчлэлийн талаар танилцуулахаар болжээ.

        Дээрх гурван талт зөвлөлдөх уулзалтыг нээж Монгол Улсын Ерөнхийлөгч У.Хүрэлсүх үг хэллээ.

Тэрбээр “Манай улсын 232 мянган иргэн цар тахлаар өвчилж, өнөөдрийн байдлаар 963 хүн нас барлаа. Цар тахлын улмаас амиа алдсан иргэдийнхээ араас харамсан гашуудаж байна. Энэхүү цар тахлаас ард иргэдийнхээ амь нас, эрүүл мэндийг хамгаалах, эдийн засгийн уналтыг зогсоох, сэргээх чиглэлээр төр засгаас тодорхой үе шаттай ажил хэрэгжүүлж ирснийг та бүхэн мэдэж байгаа. Тангараг өргөсөн төрийн албан хаагчид болон хүнд хэцүү үед бүхий л нөөц бололцоогоо дайчлан бизнесийн үйл ажиллагаагаа тасралтгүй явуулж, ажлын байраа хадгалж буй баялаг бүтээгч, хөрөнгө оруулагчдадаа ард түмнийхээ нэрийн өмнөөс талархал илэрхийлэн өндөр амжилт хүсье” гэв.