Монгол Улсын гавьяат тамирчин Э.Цэндбаатарыг удаа дараа зүй бус үйлдэл гаргасан хэмээн Боксын холбооноос хассан. Энэ талаар Э.Цэндбаатар өөрийн цахим хуудастаа мэдээлэл хийлээ.

      Тэрбээр “ Би Монголын боксын холбооноос гаргасан шийдвэрт харамсахгүй байна. Тус шийдвэрээр дэлхийн аваргад оролцох эрхийг хассан болохоос биш боксын спортоор хичээллэх эрхийг хасаагүй .Би өөрийнхөө бурууг хүлээн зөвшөөрч, үе үеийн боксчид болон холбооныхоо хамт олноос уучлалт гуйж байна. Би холбооныхоо удирдах зөвлөлд ажиллаж байсан бол зүй бус үйлдэл гаргасан тамирчиндаа хариуцлага тооцох байсан. Хоёрдугаарт, тухайн өдөр болсон хурлын дараах зоогийн ширээнд согтууруулах ундааны зүйл байгаагүй. Би нэр бүхий тамирчидтай өөр газар орж согтууруулах ундааны зүйл хэрэглэж, асуудал үүсгэсэн. Надад согтууруулах ундааны зүйл өгсөн мэт Хууль, зүйн яамны сайд Х.Нямбаатар болон Э.Бадар-Ууган  ах руу битгий дайраарай. Намайг зодсон хоёр ахад ямар ч гомдолгүй. Гомдолгүй гэдгээ цагдаад мэдэгдсэн. Архи уусан нь миний буруу учир өөртөө гэмшиж байна. Дүү нараа дэлхийн аварга шалгаруулах тэмцээнд амжилттай оролцуулахын тулд би сайн бэлтгэл хангагч нь болно. Дүү нарыгаа дэлхийн аварга шалгаруулах тэмцээнээс медаль авна гэдэгт 100 хувь итгэж байна” гэлээ.