ЭМЯ-наас цаг үеийн асуудлаар ээлжит  мэдээлэл хийлээ. Энэ үеэр ЭМЯ-ны газрын дарга Д.Баярболд “Улсын хэмжээнд өчигдрийн байдлаар 164.738 иргэн коронавирусийн гурав дахь тунд хамрагдсан байна. Энэ сарын 13-аас 18-аас дээш насныханд гурав дахь тунд Синафарм, Файзер вакцинаар хийхээр шийдвэрлэлээ. 

           Есдүгээр сарын 13-22-ны хооронд томуугийн вакцинжуулалтыг хийх юм. Засгийн газраас 360600 хүн тун томуугийн вакциныг хүлээн авсан. Өмнө нь жилд 100 мянга гаруй вакцин авч, иргэдээ дархлаажуулдаг байсан.

          Өмнөх жилүүдэд арваннэгдүгээр сарын дундаас томуугийн дархлаажуулалт эхэлдэг байсан бол энэ жил есдүгээр сарын дундаас эхлэн хийх юм. 2021 оны намар томуугийн тархалт коронавирусийн тархалттай хавсран дэгдэх эрсдэл байгаа тул томуугийн дархлаажуулалтыг эрт эхлүүлж байна. Томуугийн дархлаажуулалтыг 2-11 насны хүүхдүүд болон 65-аас дээш насны иргэд, архаг суурь  өвчтэй иргэд болон жирэмсэн эхчүүдэд томуугийн вакцин хийнэ. Жирэмсний 14-36 долоо хоногтой жирэмсэн эхэд томуугийн вакцин хийж болно. Вакцин хоорондын зай 21 хоног байна” гэлээ.