Эрүүл мэндийн яамнаас коронавирусийн халдварын тархалтын талаарх ээлжит мэдээлэл өглөө.

Энэ үеэр ХӨСҮТ-ийн дэд захирал Ж.Байгалмаа “Сүүлийн хоёр хоногийн хугацаанд халдварын тохиолдол 3000 давсан. Нийт шинжилгээнд эзлэх эерэг хариу 10 хувь хүрсэн. Мөн хөдөө орон нутагт өвчлөл эрс нэмэгдсэн. Наймдугаар сарын 28-аас хойш нийслэлд олон нийтийн газраас үйлчлүүлэх хүн амын тоо эрс нэмэгдсэн. Наймдугаар сарын 28-нд хийсэн таамаглалаар дараагийн 14 хоногт Улаанбаатар хотод өдөрт бүртгэгдэх тохиолдлын тоо 900-аас дээш гарна гэж тооцоолсон. Дүүрэг сум аймгууд дахь эерэг сорьцуудад дельта вирусийг илрүүлэх шинжилгээ хийж байна. Сүүлийн долоо хоногт дельта вирус илрүүлэх шинжилгээ 35 хувь хүрсэн” гэлээ.