УИХ-ын нөхөн сонгууль хоёр ч тойрогт болох учир улс төрийн нам, эвсэлүүд хөдөлгөөн ихтэй байна. Тодруулбал, Д.Сумъяабазар, У.Хүрэлсүх нарын оронд УИХ-д суух хоёр суудал хоосон бий. Сонгууль болохоор “солиорол” нь эхэлдэг нам, эвсэлүүд хөнжилдөө хөлөө жийлцэж, хөрөнгө мөнгөө хаялцаж эхэлсэн гэнэ. Тэр дундаа Монгол ардын нам бусдаасаа илүү "бужигнаж" байгаа сурагтай. Албан тушаал, эрх мэдлийн төлөө амь тэмцэж буй Ардын намынхны эргэн тойронд юу болж байгаа вэ.

ЕРӨНХИЙ САЙД БОЛОХ Д.АМАРБАЯСГАЛАНГИЙН НҮҮДЭЛ

          Ерөнхийлөгчийн сонгуулиас хойш чимээгүй байсан МАН-ынхан дунд нөхөн сонгуульд хэнийг нэр дэвшүүлэх вэ гэдэг асуудал маргаан дагуулж байна. Тэгвэл урьдчилсан байдлаар МАН-ын генсек Д.Амарбаясгалан тус сонгуульд нэр дэвших тохироонд хүрчээ. Аль ч цаг үед тус намын хариуцлагатай албан тушаалд томилогддог Д.Амбарбаясгалан УИХ-ын гишүүн болоод зогсохгүй Монгол Улсын Ерөнхий сайд болох нүүдлээ эхлүүлж буй нь энэ гэнэ. Тэрбээр гишүүн болсныхоо дараа Ерөнхий сайдын “сэнтийд” залрахын тулд Засгийн газрыг унагаж, Л.Оюун-Эрдэнийг унагахаар төлөвлөсөн бололтой.

ОЙЧИХОО ДӨХСӨН Л.ОЮУН-ЭРДЭНЭ Х.БАТТУЛГААС ТУСЛАМЖ ЭРСЭН НЬ

         Ардын намынхандаа “жийгдэж” байгаа Ерөнхий сайд Л.Оюун-Эрдэнэ Ардчилсан нам руу гүйж, экс Ерөнхийлөгч Х.Баттулгаас аврал эрж очсон гэнэ. Учир нь, Х.Баттулгын гарт түүний талаарх ноцтой баримтууд байгаа аж. Хур их “факт” нь илчлэгдэх дөхсөн Ерөнхий сайд “Ах аа, больё оо хамтарч ажиллая” хэмээн уучлал хүсэн очиж, нууц уулзалт хийсэн байна. “Хар хайрцаг”-ыг нь хав дарсан Х.Баттулгыг өөрийнхөө орон тооны бус зөвлөх болгосон нь ийм учиртай бололтой.

СҮ.БАТБОЛДЫГ ГОМДООСОН ХЭНТИЙН ФРАКЦЫНХАН "СҮЙРЭХ" ДӨХСӨН ҮҮ

             Ерөнхийлөгч У.Хүрэлсүх, Ерөнхий сайд Л.Оюун-Эрдэнэ тэргүүтэй Хэнтийн фракцынхан УИХ-ын гишүүн асан Сү.Батболдод “сүүлээ харуулсан” гэнэ. Тэдний эл үйлдэлд гомдсон Сү.Батболд М.Энхболдын бүлэглэлд нийлсэн байна. Сү.Батболд нэгдсэн бүлэглэлийнхээ сонгуульд өрсөлдөх бүх л санхүүжилтийг өөрөөсөө гаргаж буй гэнэ. Өөрөөр хэлбэл, Ерөнхийлөгч, Ерөнхий сайдын хэн нь ч байсан тэдний эсрэг хөдлөх гол хүчийг Сү.Батболд санхүүжүүлнэ гэсэн үг.

 Хэрэв энэ зураглалаараа явах юм бол намынхныхаа дунд болон олон нийтэд нэр хүндтэй байгаагаараа Д.Амарбаясгалан нөхөн сонгуулийн дараа Монгол Улсын Ерөнхий сайдаар томилогдох бололтой.

 

АРДЫН НАМЫНХНЫ ТОХИРОЛЦОО БУЮУ ЗАСГИЙН ГАЗРЫН ШИНЭ БҮТЭЦ ЯРИГДАЖ ЭХЭЛЖЭЭ

         Ерөнхий сайд Л.Оюун-Эрдэний Засгийн газар унасан ч бай, унаагүй ч бай бүтцийг нь шинэчлэх тохиролцоог эрх баригчид хэдийнэ хийжээ. Тухайлбал, “томилгоо хийгчид” Засгийн газрын Хэрэг эрхлэх газрын даргаар одоогийн Шадар сайд С.Амарсайханыг томилохоор ярьжээ. Ингэснээр түүний Шадар сайдын суудлыг МАХН-д бэлэглэхээр болсон тухай яриа чих дэлсэх болов. Ямар ч байсан төрдөө хаягдсан Н.Энхбаяр Ерөнхийлөгчийн сонгуульд элбэснийхээ хариуд өөрийн намдаа гялтайх ганц суудал авч буй нь энэ. Харин Ерөнхий сайдын суудалд хоёр хүн яригдаж байгаа гэнэ. Тухайлбал, Ерөнхий сайд болох “тулаан” МАН-ын Ерөнхий нарийн бичгийн дарга Д.Амарбаясгалан, Сангийн сайд асан Ч.Хүрэлбаатар нарын дунд хүчтэй өрнөж байгаа аж. Мөн Зам тээврийн хөгжлийн сайд Л.Халтарыг хамгийн түрүүнд унагаж, түүний оронд шилэн Цогоо буюу Б.Цогтгэрэлийг томилж, Ц.Нямдоржийг Улсын ерөнхий прокурорын газрын даргаар тавих хувилбар яригдаж байгаа гэнэ. Хэрэв энэ зураглалаараа явах юм бол намынхныхаа дунд болон олон нийтэд нэр хүндтэй байгаагаараа Д.Амарбаясгалан нөхөн сонгуулийн дараа Монгол Улсын Ерөнхий сайдаар томилогдох бололтой.