Ардчилсан намаас өнөөдөр цаг үеийн асуудлаар мэдээлэл хийлээ. Тодруулбал, тус намын Дэд дарга Р.Эрдэнэбүрэн, Ерөнхий нарийн бичгийн дарга Ч.Өнөрбаяр нар УИХ-ын 18, 28 дугаар тойргийн нөхөн сонгуулийн бэлтгэл ажлын талаар болон төрийн албаны шинэчлэл, улс төрийн намын тухай хуулийн шинэчлэлийн асуудлаар дараах мэдээллийг хийсэн юм.

АН-ын дэд дарга Р.ЭРДЭНЭБҮРЭН: Манай нам Сонгинохайрхан дүүрэг болон Хэнтий аймагт болох нөхөн сонгуульд нэгдэж орох, парламентад суудалгүй намуудтай хамтрах уриалгыг дэвшүүлэн ажиллаж байна. Иймээс парламентад суудалгүй намуудтай уулзалт, яриа хэлэлцлүүдийг ээлж, дараатай зохион байгуулж байна. Ардчилсан намаас УИХ-ын нөхөн сонгуульд нэр дэвшигчдийн албан хүсэлтийг наймдугаар сарын 27 буюу маргаашнаас эхлэн хүлээж авна. 

АН-ын ерөнхий нарийн бичгийн дарга Ч.ӨНӨРБАЯР:  Ардчилсан намын орон нутаг дахь гишүүд, дэмжигчдэд олон гомдол ирж байна. Шинээр мөрдөгдөж эхэлсэн Төрийн албаны тухай хуульд орон нутгийн хурлын төлөөлөгчдийн 30 хүртэлх хувь нь төрийн жинхэнэ албан хаагч байхаар тусгасан. Гэвч МАН засаглаж байгаа орон нутагт энэ тоо хэтэрсэн. Өөрөөр хэлбэл, намынхаа хүн болгонд албан тушаал хуваарилсан. Үүнээс болоод 30 хувь биш зарим газар хурлын төлөөлөгчдын  60, 90 хувь нь төрийн жинхэнэ албан хаагч болсон гэх гомдол ирж байна. Ийм асуудал байгаа бол төрийн албаны зөвлөл мэдээлэл авч, Сонгуулийн ерөнхий хороо нөхөн сонгууль зарлах ёстой гэсэн албан шаардлагыг хүргүүлж байна. Мөн Төрийн албаны хуулийн шинэчлэлийн асуудал дээр тодорхой саналууд хүргүүлж, хамтарч ажиллана. Үүнээс гадна Улс төрийн намын хууль, гишүүнчлэлийн асуудлыг шинэчлэх зайлшгүй шаардлагатай. Иймээс манай нам Ерөнхийлөгч У.Хүрэлсүхэд улс төрийн намын тухай хуулийг өргөн барьж, намрын чуулганд батлуулахыг уриалж байна.