БШУ-ны сайд Л.Энх-Амгалан өнөөдөр их, дээд сургууль эхлэхтэй холбогдуулан мэдээлэл хийлээ.

         Тэрбээр “Боловсрол шинжлэх ухааны сайдын тушаалаар өнгөрсөн хавар сургуулийн төлбөртэй холбоотойгоор түр журам баталсан. СУИС бусад сургуулиас хамгийн хямдхан байдаг учир нэг кредитэд 20 мянган төгрөгийн төлбөр нэмэхээр болсон.

         Төрийн өмчийн бүх сургууль сургалтын төлбөрөө нэмэхгүй. Мөн өмчийн хэлбэр үл харгалзан сургуулийн төлбөр нэмэхгүй байх түр журмыг БШУЯ-наас гаргасан. Өнгөрсөн жилүүдэд их, дээд сургуулиуд анги хувиарлалт, хичээл сонголт хэмээн оюутнуудыг барьцаалж төлбөрөө бүтэн авдаг байсан.

        Иймээс энэ жил ийм үйлдэл гаргахыг хатуу хориглоно. Өөрөөр хэлбэл, өмчийн аль ч хэлбэрийн сургууль бүтэн жилийн төлбөр авах ёсгүй, зөвхөн гүйцэтгэлээрээ төлбөр нэхэмжлэх ёстой. Үүнийг зөрчсөн бүх сургуульд хатуу хариуцлага тооцно” гэв.