Засгийн газрын ээлжит хуралдаан боллоо. Тус хуралдаанаас гаргасан шийдвэрийг танилцуулах үеэр УОК-ын нарийн бичгийн дарга Т.Баярхүү сэтгүүлчдийн асуултад хариуллаа.

         Тэрбээр, “Өндөржүүлсэн бэлэн байдлын зэрэгт шилжүүлсэн хугацаанд гадна талбайд тэмцээн, уралдаан зохион байгуулах эсэхийг тухайн аймгийн Засаг дарга, онцгой комисс шийднэ гэх шийдвэрийг УОК-оос гаргасан. Энэ хүрээнд хэд хэдэн аймагт тэмцээн уралдаан зохион байгуулсан. Харин намрын ургац хураалт, өвөлжилтийн бэлтгэл ажил, хичээл сургууль эхлэх гэж байгаатай холбогдуулан энэ сарын 21-нээс тэмцээн уралдаан зохион байгуулахыг хориглосон.

             Цаашдаа нөхцөл байдалтай уялдуулан шийдвэр гаргаад явна. Мөн Баян-Өлгий аймаг халдварын нөхцөл байдалтай холбоотойгоор 10 хоногийн хугацаатай хөл хорио тогтоох саналаа УОК-т ирүүлсэн. Таван удаагийн эрсдэлийн үнэлгээгээр "Эрдэл өндөр" гэж үнэлэгдсэн учраас саналыг нь хүлээн авч, аймгийн Засаг дарга захирамж гарган хөл хорио тогтоосон. Өөрөөр хэлбэл, аймгууд тодорхой хэмжээний хязгаарлалт тогтоох саналаа УОК-т ирүүлэн зөвшилцөж шийдвэр гаргаад явж байгаа. 

           Үүнээс гадна  Улаанбаатар хотод үйлчилгээ эрхэлж буй аж, ахуйн нэгжүүд хариуцлагын гэрээ байгуулж цагийн хязгаарлалттай ажиллаж байгаа. Цаашдаа ч зарим ААН-ийн хувьд цагийн хязгаарлалт хийх байх. Халдварын нөхцөл байдалтай уялдуулан шийдвэр гаргаж байгаа бөгөөд аль болох аж ахуйн нэгжүүдээ дэмжих чиглэлийг барьж байгаа” гэв.