“Танкийн биатлон 2021” тэмцээнд оролцож байгаа багийн нэгдүгээр экипаж болох Монгол, Венесуэл, Сири, Вьетнам зэрэг орны танкчид өчигдөр буюу наймдугаар сарын 23-ны өдөр нэг гараанд уралдлаа.

Монгол Улсын Зэвсэгт хүчний танкийн даргаар дэслэгч М.Зундуйжамц /336/ Танкийн ротын захирагчийн зэвсэглэл техник хариуцсан орлогчоор танкийн буудагч, хошууч З.Анхбадрах /311/, механик-жолоочоор ахлах ахлагч Д.Дэмидсүрэн /327 / нар уралдаж их буу болон пулемётуудын байнууд болох их бууны гурав, НСВТ пулемётын нэг, ПКТ пулемётын нэгийг бүрэн устгаж, нийт цаг 23.57 минутын амжилт үзүүлэн гараандаа нэгдүгээр байрыг эзэлсэн байна.

“Танкийн биатлон 2021” тэмцээний нээлт өчигдөр болсон бөгөөд тус ажиллагаанд Батлан хамгаалах яамны Төрийн нарийн бичгийн дарга, бригадын генерал Д.Ганхуяг, ОХУ-д суугаа Элчин сайдын яамны Цэргийн атташе, хошууч генерал Р.Сүхбат, ЗХЖШ-ын Материал техникийн газрын Зэвсгийн хэлтсийн дарга, хурандаа П.Чинзориг нар оролцож баг тамирчидтай уулзаж баяр хүргэж амжилт хүссэн юм.

“Танкийн биатлон 2021” тэмцээнд 19 улсын баг, тамирчид оролцож байгаагаас нэгдүгээр дивизионд 11 улсын 33 экипаж уралдахаас өчигдрийн байдлаар долоон экипаж уралдсан.