Монгол Улсад залуучуудын байгууллага үүсэж, хөгжсөний 100 жилийн ойн хүрээнд залуучуудын дунд тулгамдаж байгаа хорт зуршлын асуудлыг хөндөж, Нийслэлийн Гэр бүл  хүүхэд залуучуудын хөгжлийн газар, Хөдөлмөр нийгмийн хамгааллын төв, ГБХЗХГ-ын харьяа Наркологийн эмнэлэг хамтран “Хорт зуршилгүй залуу” аяныг хэрэгжүүлж байгаа юм. Үүнтэй холбоотойгоор аяны хэрэгжилтийн талаарх мэдээллийг өнөөдөр хийлээ.

Хүүхдийн хүчирхийллийн 77 хувь , гэмт хэрэг үйлдэгчдийн 50-60 хувь нь архи, согтууруулах ундаа хэрэглэснээс үүдэн гэмт хэргийн хохирогч, хэрэгтэн болдог байна. Энэ жилийн хувьд  Хөдөлмөр нийгмийн хамгааллын яам “цахим яам” болох зорилгынхоо хүрээнд “Хорт зуршилгүй залуу” цахим үйлчилгээг бий болгосон. Ингэхдээ 24 цагаар үнэ төлбөргүй  мэргэжлийн сэтгэл зүйчид  1800-1893 дугаарын утсаар  мэдээлэл, зөвлөгөөг өгөх юм. Энэхүү үйлчилгээ нь архи, тамхинаас татгалзах гэж байгаа залуучуудад зориулсан бөгөөд гурван төрлийн үйлчилгээ авах боломжтой юм байна.

Үүнд:

• 24 цагаар зөвлөгөө авах
• Шаардлагатай тохиолдолд ганцаарчилсан болон бүлгийн уулзалт  хийж ярилцах
• Тухайн хандаж буй хүн архаг тамхинд орсон бол үнэ төлбөргүйгээр хэвтэн эмчилгээг хийлгэх боломжтой юм.

Дэлхий дээр нэг өдөрт дунджаар гурван сая хүн архинаас болж нас бардаг гэсэн судалгааг ДЭМЯ-наас гаргасан байна. Тэгвэл уг аяныг “Залуучууд архи, тамхинаас гарч гангарч байна” уриатайгаар зохион байгуулж байгаа билээ. Энэ аяны хүрээнд нийт 100 залууг хорт зуршлаас гаргах зорилго дэвшүүлж ажиллаж байгаагаас 30-аад хувь нь эмчилгээнд хамрагдаж, эдгэрч байгаа юм. Мөн  108 дугаараар дамжуулан архи, тамхи болон бусад мансууруулах, сэтгэцэд нөлөөтэй бодис, дэлгэцийн хамааралтай, дэлгэцэд донтсон хүмүүст мэргэжлийн зөвлөгөө , эмчилгээ үйлчилгээ шаардлагатай бол 1800-1893 шилжүүлээд онлайн болон утсаар шаардлагатай анхан шатны өөрөө өөрийгөө хорт зуршлаас татгалзах зөвлөмжүүдийг өгөх аж. 

          Наркологийн эмнэлэгт жилд дунджаар  2000-2200 гаруй хүн хэвтэн эмчлүүлдгээс 40-45 хувь нь 35 хүртэлх насны залуучууд байдгийн 95 хувь нь архины хамааралтай, архи хэтрүүлэн хэрэглэдэг, архинаас шалтгаалсан бие мах бодийн  өвчин эмгэгтэй залуучууд үйлчлүүлдэг. Энэ залуучуудын дийлэнх хувь тамхи татдаг бөгөөд  “Хорт зуршилгүй 100 залуу” аяныхаа хүрээнд тамхинаас татгалзах хөдөлгөөнийг түлхүү өрнүүлж,  тамхины эмчилгээний найман алхамт  хөтөлбөрийг хэрэгжүүлж байна.  Энэ хөтөлбөрт зөвхөн Монгол Улсад ажиллаж, амьдарч буй залуучуудаас гадна гадаадад ажиллаж, амьдарч буй залуучууд ч хамрагдах боломжтойгоороо онцлог болж байгаа юм.

М.ЭНХЗУЛ