Нийслэлийн Засаг дарга бөгөөд Улаанбаатар хотын захирагч Д.Сумъяабазар "Нийслэлийн авто машины тоо жилд 80 мянга орчмоор нэмэгдэж байна. Тухайлбал, нийт авто замын 78 хувь нь түгжрэлтэй байдаг гэх тооцоолол бий. Иймээс түгжрэлийг бууруулахад зориулан улсын төсвөөс 420 тэрбум төгрөг зарцуулах тогтоол гаргасан. Энэ төслийн ТЭЗҮ, бичиг цаас нь ном журмын дагуу, хуулийн хүрээнд бүрдсэн. Хэрэгжих ажлуудыг Сангийн яамнаас цаг тухай бүрд нь санхүүжүүлээд явна. Нийслэл хотын 2022 оны төсвийг сая Сангийн яаманд хүргүүлсэн. Есдүгээр сарын 15-ныг хүртэл нарийн жижиг хэсгүүд дээр ажиллана.

       Улаанбаатар хотын түгжрэл үндсэндээ их тойруу дотор байгаа учраас төрийн болон худалдааны байгууллага, хувийн хэвшлүүдийг энэ бүсээс гаргах асуудлаар уулзалтын ширээний ард сууна. Үүний дараа дэд төвүүдээ барьж байгуулна.

       Цаашлаад дагуул хотуудыг байгуулах нь түгжрэлийг бууруулахад хамгийн том нөлөө үзүүлнэ гэж үзэж байгаа. Одоогийн жишгээр жилд 80 мянган автомашин нэмэгдээд байвал 2025 он гэхэд 24.3 их наяд төгрөгийн алдагдлыг шууд болон шууд бусаар хүлээнэ.

     Түгжрэлийг бууруулах чиглэлээр таван цогц арга хэмжээг авч хэрэгжүүлэхээр төлөвлөж байгаа.Нийтийн тээврийн парк шинэчлэлийн хүрээнд 400-500 автобусыг шинэчлэх шаардлагатай" гэв