Өнөөдөр Барилга, хот байгуулалтын сайд Б.Мөнхбаатар болон холбогдох албаныхан Төв цэвэрлэх байгууламжийг шинээр барих төслийн гүйцэтгэлийн явцтай танилцлаа.

Тодруулбал, Улаанбаатар хотын Сонгинохайрхан дүүргийн 20 дугаар хорооны нутаг дэвсгэрт 17.6 га талбайг хамарсан шинэ цэвэрлэх байгууламж барихаар төлөвлөсөн байна.

       Шинээр баригдах төв цэвэрлэх байгууламжийн барилга угсралтын ажлыг 2020-2023 онд хийж гүйцэтгэхээр төлөвлөсөн байдаг. Мөн бйгууламжийн туршилт тохируулгын ажлыг 1.6 жил хийж 2024 онд хүлээлгэн өгөхөөр шийдвэрлэсэн. Энэ хүрээнд тус цэвэрлэх байгууламж дээр ажиллах ажиллагсдын чадавхыг нэмэгдүүлэх, дадлагажуулах ажлыг зохион байгуулах аж. Төслийн явцад нийт 35 барилга байгууламж, инженерийн шугам сүлжээ дэд бүтэц баригдах юм. Тэгвэл шинэ цэвэрлэх байгууламжийн лагийн боловсруулалтад дэлхийн тэргүүлэгч технологийг хэрэглэхээр сонгожээ. Лагийг мезофил зарчмаар био хий гарган авах замаар эрчим хүч ба дулаан гаргаж авснаар үйлдвэрлэлийн дотоод хэрэгцээний дулааныг ханган цэвэрлэх байгууламжийн ашиглалтын зардлыг нөхөж, цаашлаад эрчим хүч үйлдвэрлэдэг цэвэрлэх байгууламж болох эхлэл тавигдах аж.

          Төслийн барилга угсралтын ажлын хөрс хуулалт, суурийн газар шорооны ажлыг 2019 оны намар, өнгөрсөн оны наймдугаар сард үндсэн байгууламжийн ажлыг эхлүүлсэн. Одоогоор “А” болон “Б” биореакторын барилга угсралтын ажил 40 хувьтай байгаа бол хоёрдугаар тунгаагуур, лаг өтгөрүүлэгч, захиргаа болон зам гүүрийн барилгын ажлуудыг эхлүүлээд байна. Нийт төслийн барилга угсралтын ажлын явц 28 хувьтай байгаа гэнэ. Төслийн талбайд гадаадын 50, монгол талын 450 инженер техникийн ажилтан ажиллаж байна.