Нийслэлийн удирдах ажилтнуудын шуурхай зөвлөгөөн өнөөдөр боллоо. Зөвлөгөөнийг Нийслэлийн Засаг дарга бөгөөд Улаанбаатар хотын Захирагч Д.Сумъяабазар Хан-Уул дүүргийн ЗДТГ-аас цахимаар зохион байгуулсан юм. Хотын дарга хурлын үеэр нийслэлийн хөдөлгөөн удахгүй эрчимжих учир үүнд холбогдох албаныхан анхаарал хандуулан ажиллахыг үүрэг болголоо.

      Тэрээр "Хичээлийн шинэ жилийн нээлт удахгүй болно. Их дээд сургуулиудын оюутнууд орж ирж, наймдугаар сарын 25-аас 11-р сар хүртэл нийслэлийн хөдөлгөөн эрчимжинэ. Тиймээс бэлтгэл ажлаа маш сайн зохион байгуулах хэрэгтэй. Зарим үйлчилгээний байгууллагын халдвар хамгааллын дэглэм мөрдүүлэх журмыг танилцуулах, мөн замын хөдөлгөөний ачааллыг хэрхэн зохицуулах талаар санал боловсруулах, нийтийн тээврийн үйлчилгээг нэмэгдүүлэх зэрэг тайлан мэдээг тогтмол танилцуулна уу. Сургууль, цэцэрлэгийн хичээлийн шинэ жилийн нээлтийн асуудалд онцгой анхаарч ажиллах ёстой шүү.

     Мөн нийслэлийг олон жил муухай харагдуулсан зүйл бол граж ямар ч зөвшөөрөлгүйгээр иргэдээс булаан авч, орон зайг бөглөсөн.  Манайх шиг гарааштай хот энэ дэлхий дээр байхгүй дээ. Тиймээс хотын эмх цэгцгүй байдалд нөлөөлж, зөвшөөрөлгүй гражийг цаашид буулгана. Үүнд хэн нэгний саналыг сонсоод байлгүй шууд л буулгаж, нураах арга хэмжээ авна. Үүнийг дүүргийн Засаг дарга нар ч дэмжиж байгаа. Зардал хөрөнгө, хүн хүч гаргаад ажиллаж байгаа учир үүнийгээ баталгаатай болгоод иргэдийнхээ хяналтад өгчих ёстой байгаа юм" гэлээ.