Баян-Өлгий аймгийн Цэнгэл сумын Хөшөөт багийн Ховд голын гүүр гэх газар аймгийн төвөөс хойт зүгт 80 километр газар сэтгэцийн өөрчлөлттэй, 25 настай эрэгтэй сураггүй болжээ. Тодруулбал, наймдугаар сарын 12-ны өдөр сэтгэцийн өөрчлөлттэй 25 настай эрэгтэй загасанд яваад сураггүй болсон гэх дуудлагыг аймгийн Онцгой байдлын газар наймдугаар сарын 13-ны 06:07 цагт хүлээн авсан байна.

Тус аймгийн Онцгой байдлын газрын Цэнгэл сум дахь Гал түймэр унтраах, аврах 71 дүгээр ангийн алба хаагчид, сумын мэргэжлийн ангийн иргэд, ар гэрийн хүмүүс наймдугаар сарын 15-нд Ховд голд 2.5 метрийн гүнд 12 удаа шумбаж, 17 километр газар явганаар хайх ажиллагаа зохион байгуулсан боловч үр дүнд хүрээгүй тул мөн өдрийн 21:00 цагт эрлийг түр зогсоожээ. Ховд голын эргээс тухайн иргэний авч явсан загасны уурга, хутга, барьсан загас зэргийг эрлийн багийнхан олсон байна.