Хүнсний улаанбуудайг Хөдөө аж ахуйн биржээр арилжих бэлтгэл ажлын хүрээнд ХХААХҮЯ, Хөдөө аж ахуйн бирж болон үндэсний гурилын үйлдвэрүүдийн төлөөлөл хамтран ажиллах, санал солилцох уулзалт зохион байгуулжээ.

Уулзалтад ХХААХҮ-ийн яамны Бодлого, төлөвлөлтийн газрын дарга Ц.Болорчулуун, Хөдөө аж ахуйн бирж  ХХК-ийн гүйцэтгэх захирал Ж.Осоржамаа болон биржийн удирдлага, албан хаагчид, худалдан авагч тал болох гурилын үйлдвэрүүд, дундын зуучлагч брокеруудын төлөөлөл оролцсон юм.

Хүнсний улаанбуудай арилжих бэлтгэл ажлын хүрээнд гурилын үйлдвэрүүдийн улаан буудай хүлээн авах силос агуулахыг биржийн итгэмжлэлд хамруулах, бүтээгдэхүүний чанар, стандартыг тодорхойлох, лабораторийн дүн шинжилгээ хийх, биржийн итгэмжлэл олгох ажлыг ойрын хугацаанд хэрэгжүүлэх талаар Хөдөө аж ахуйн биржээс танилцуулжээ.

Гурил үйлдвэрлэгчдийн зүгээс, арилжаанд оролцох зураглал, урамшуулал, төлбөр тооцоо, гэрээ, журам, түр журмуудыг хуульд нийцүүлэх талаар санал солилцон цаашид бирж, боловсруулах үйлдвэрийн оролцогчид хамтран ажиллахаар санал нэгдэн уулзалт амжилттай болж өндөрлөсөн байна.