Ардын хувьсгалын 100 жил, Дорнод аймгийн 90 жилийн ойд зориулсан хүчит 128 бөхийн барилдаан энэ сарын 10-ны өдөр болсон. Тус барилдаанд Дорнод аймгийн Дашбалбар сумын харьяат, улсын харцага Д.Анар түрүүлж, аймгийн арслан Г.Төрмөнх үзүүрлэсэн юм.

        Энэ үеэр улсын харцага хангай учраа таарсан бөхөө давсан хэр нь шилдэн дарж, дахин шуудагнаас нь татан чирж, гулдрах зэргээр ёс зүйгүй үйлдэл гаргажээ. Тэрбээр энэ үйлдлээрээ бөх сонирхогчдын дургүйг хүргэж, нутгийн иргэдийн итгэлийг хугалсан гэх. 

        Тэгвэл үүнтэй холбогдуулан Монголын үндэсний бөхийн холбооноос санамж гаргажээ. Ингэхдээ Хөвсгөл, Дорнод аймагт бөхчүүд цол наймаалцсан тул цол олгохгүй байхаар шийдвэрлэсэн аж. Мөн Дорнод аймагт түрүүлсэн улсын харцага Д.Анарт холбогдох гомдлыг МҮБХ-ны тэргүүлэгчдийн хурлаар хэлэлцэхээр болсон байна. 

        Монголын үндэсний бөхийн холбооноос санамж бичиг гаргасны дараагаар улсын харцага Д.Анар өөрийн жудаггүй үйлдэлдээ уучлалт гуйжээ. Тодруулбал, тэрбээр “Сайн байцгаана уу. Миний бие наймдугаар сарын 10-нд Дорнод аймгийн цол олгох барилдааны зургаагийн даваанд аймгийн арслан Шинэ-Зоригтой барилдсан. Уг барилдаанд миний бие ёс зүйгүй үйлдэл гаргасандаа аймгийн арслан Шинэ-Зориг болон Дорнод аймгийн зон олон, бөхөд хайртай ард түмнээсээ уучлалт гуйж байна. Миний бие МҮБХ-оос гаргасан шийдвэр, хариуцлагыг хүндэтгэнэ” хэмээн өөрийн цахим хуудастаа нийтэлжээ.

Уг барилдаанд миний бие ёс зүйгүй үйлдэл гаргасандаа аймгийн арслан Шинэ-Зориг болон Дорнод аймгийн зон олон, бөхөд хайртай ард түмнээсээ уучлалт гуйж байна.