Булган аймгийн Хангал сумын нутаг дэвсгэрт таван иргэн 200 орчим килограмм дэрвэгэр жиргэрүү ургамал түүж хадгалсан байсныг долдугаар сарын 25, 28-ны өдөр цагдаа нар хяналт шалгалтын үеэр илрүүлжээ.  Тус аймгийн цагдаагийн газраас мөрдөн, шалгах ажиллагааг явуулж байгаа аж.

        Эрүүгийн хуулийн 24.8 дугаар зүйлд “Зохих зөвшөөрөлгүйгээр, хуульд зааснаас өөр зорилгоор нэн ховор, ховор ургамал, тэдгээрийн үр, эрхтэнийг түүсэн, бэлтгэсэн, худалдсан, худалдан авсан, хадгалсан, тээвэрлэсэн, боловсруулсан бол таван мянга дөрвөн зуун нэгжээс хорин долоон мянган нэгжтэй тэнцэх хэмжээний төгрөгөөр торгох, эсвэл нэг жилээс таван жил хүртэл хугацаагаар зорчих эрхийг хязгаарлах, нэг жилээс таван жил хүртэл хугацаагаар хорих ял шийтгэнэ” хэмээн заасан байдаг.

         Дэрвэгэр жиргэрүү нь 2018 оны нэгдүгээр сараас эхлэн Монгол орны ховор ургамлын жагсаалтад орсон. Биологийн нөөцийг хамгаалах, газрын эвдрэл доройтлыг бууруулах зорилгоор байгалиас түүж бэлтгэхийг 2023 оны нэгдүгээр сарын 1 хүртэл таван жилийн хугацаатай хориглосон юм.