Дорноговь аймгийн Замын-Үүд боомтын үйл ажиллагааг эрчимжүүлэх, ачаа тээврийн нэвтрэлтийг нэмэгдүүлэх, төрийн байгууллагын хүнд суртлыг халах зорилгоор Засгийн газраас томилсон ажлын хэсэг хэд хэдэн ажлыг санаачлан хэрэгжүүлээд байгаа аж.

Тодруулбал Замын-Үүд сумыг ногоон бүс болгох зорилгоор “Нэг өрх-нэг хаалга” шинжилгээг авч, хөл хорио тогтоон эрүүл ахуйн дэглэмийг сахиулж чадсанаар өвчлөлийн тоог эрс буруулжээ. Мөн улсын хилийн орох гарах чиглэл буюу экспорт, импортын  талд халдваргүйжүүлэх хоёр байгууламжийг суурьлуулсан байна. Ингэснээр хүрээнд өдөрт 300 гаруй, сард 6500 гаруй тээврийн хэрэгслийн гадаргууг автоматаар халдваргүйжүүлэх шуурхай үйлчилгээ нэвтэрчээ.

      Хилийн цэсэд улаан, шар, ногоон бүсчлэлийг тогтоон эмх цэгцэнд оруулж, эрүүл мэндийн үйлчилгээний, бүртгэлийн, хог хаягдалын, техникийн цэгүүд болон тусгаарлан ажиглах байр зэргийг байршуулан тохижилт хийсэн байна. Мөн Замын-Үүд суманд үйл ажиллагаа эрхэлдэг 311 аж ахуйн нэгж, иргэн төрийн байгууллагуудад ковидоос урьдчилан сэргийлэх зөвлөмж мэдэгдэл өгч гүйцэтгэлийн хяналтыг хийж ажилласаны үр дүнд хяналтын 12 терминалууд нь халдваргүйтэл хаалга, талбайн мананцартай халдваргүйтэл, бичиг цаасны халдваргүйтэлийн төхөөрөмжүүдийг шинээр нэвтрүүлж үйлчилгээ явуулж эхэлжээ.

     Ажлын хэсэг анх томилогдон очиход импортоор өдөрт 100 тээврийн хэрэгсэл орж ирдэг байсан бол өдгөө улсын хилээр 190 тээврийн хэрэгсэл, 100-120 тонн ачаа оруулж ирэх болжээ. Ингэснээр Эрээн боомтод олон сараар хуримтлагдсан 50 мянган тонн ачааны 30 мянган тонныг нь нэвтрүүлээд байгаа аж. Үүнээс гадна үнийн өсөлтийг бууруулах чиглэлээр хэд хэдэн удаа жолооч нартай уулзалт зохион байгуулж, гэрээ байгуулжээ. Улмаар ачаа тээврийн дээд үнийг 10 сая төгрөгт барихаар ажиллаж эхэлжээ.

Ташрамд дурдахад, Замын-Үүд дэх 12 хяналтын талбайд ачаа тээврийн хэрэгслийг хонуулахгүйгээр Улаанбаатар хот руу гаргах ажлыг зохион байгуулж байна.