“Ховд баруун бүсийн хурд-2021” даншиг наадам өнгөрсөн амралтын өдрүүдэд боллоо.  Бүсийн наадмын хурдан морины уралдааны үеэр 30 гаруй хүүхэд мориноос унаж, дөрвөн хүүхэд хүнд бэртжээ.

Энэ талаар Ховд аймгийн бүсийн оношилгоо, эмчилгээний төвийн даргаас тодрууллаа. Тэрбээр “Даншиг наадмын үеэр манай эмнэлгийн эмч, сувилагчид хуваарийн дагуу ажилласан. Хурдан морины уралдааны үеэр 30 гаруй хүүхэд мориноос унаж, дөрвөн хүүхэд эмнэлгийн тусламж, үйлчилгээ авсан. Тодруулбал, 13 настай хүүхдийн хамрын яс, хоёр хүүхдийн гар хугарсан гэсэн оноштойгоор эмнэлэгт хэвтэн эмчлүүлж байна. Нэг хүүхдийн хөл зөөлөн эдийн гэмтэл авсан тул шаардлагатай эмчилгээг хийж, гэрт нь буцаасан байгаа. Хамрын яс хугарсан хүүхдийн бэртэл хүнд учраас шаардлагатай эмчилгээг цаг алдалгүй хийж байна. Тухайн хүүхэд нь Завхан аймгийн унаач юм билээ. Эцэг, эх болон уяач нь хүүг Завхан аймаг руу авч явах хүсэлт гаргасан. Бид хаванг нь буулгаж, эмчилгээ хийлгэх шаардлагатай учраас зөвшөөрөөгүй. Яг хэдэн хүүхэд мориноос унасан гэх тодорхой мэдээлэл алга байна. Надад ирсэн мэдээллээр зөвхөн их насны морины уралдаанд 30 гаруй хүүхэд унасан гэсэн” гэлээ.

“Ховд баруун бүсийн хурд-2021” наадамд азарга 221, соёолон 196, даага 179, нийт  596  хурдан морь уралджээ.