Коронавирусийн халдварт цар тахлаар өвчилсөн иргэдийн 42.6 хувь нь аль нэг төрлийн вакцинд хамрагдсан байжээ. Долдугаар сарын 31-ний өдрийн байдлаар Монгол Улсын 12, түүнээс дээш насны хүн амын 84.6 хувь нь бүрэн тунд хамрагдсанаас 69.5 хувь буюу 10 хүн тутмын долоо нь БНХАУ–ын "Вероселл" вакцин хийлгэсэн байна.

        Тодруулбал, өвчилсөн иргэдийн 13.1 хувь нь нэгдүгээр тунд хамрагдсаны дараа, 29.5 хувь нь бүрэн тунд хамрагдсаны дараа өвчилсөн байна. Харин өвчилсөн иргэдийн 57.4 хувь нь огт вакцинд хамрагдаагүй иргэд байна.

       БНЭУ-ын "Астразенека" вакцины бүрэн тунд хамрагдсан иргэдийн 8.7 хувь нь коронавирусийн халдвараар өвчилсөн нь бусад вакцинтай харьцуулахад хамгийн өндөр байна. Харин манай улсын хүн амын ихэнх хувь нь БНХАУ-ын "Вероселл" вакцинд хамрагдсан бөгөөд эдгээр иргэдийн 2.6 хувь нь бүрэн тунд хамрагдсаны дараа өвчилжээ.

    Коронавирусийн халдварын эсрэг вакцины бүрэн тунд хамрагдсанаас хойш өвчилсөн иргэдийг вакцинд хамрагдсан өдрөөс хойш халдвар авсан хоногоор авч үзэхэд 31 ба түүнээс дээш хоногийн дараа өвчилсөн иргэд дийлэнх хувийг эзэлж байна. Тодруулбал, “Астразенека”  вакцины бүрэн тунд хамрагдсанаас хойш 31 ба түүнээс дээш хоногийн дараа өвчилсөн иргэд хамгийн өндөр буюу 81.7 хувийг эзэлж байгаа бол  "Спутник" 71.4 хувь байна.

      "Вероселл" вакцинд хамрагдсаны дараа халдвар авсан иргэдийн 15.9 хувь нь 14 хүртлэх хоногт, 16.9 хувь нь 15-30 хоногийн дотор өвчилсөн байна. "Файзер" вакцинд хамрагдсаны дараа халдвар авсан иргэдийн 36.7 хувь нь 14 хоногийн дотор өвчилсөн байна.

12-24 нас болон 70-аас дээш насныхны талаас илүү хувь нь дархлаажуулалтын бүрэн тунд хамрагдсанаас хойш 45 хоногийн дотор халдвар авсан бол 25-69 насны иргэдийн талаас илүү хувь нь 45-аас дээш хоногийн дараа өвчилсөн байна. Коронавирусийн халдвараар нас барагчдын дийлэнх буюу 52.5 хувь нь вакцинд хамрагдаагүй, 24.2 хувь нь бүрэн тунд, 23.3 хувь нь нэгдүгээр тунд хамрагдсан байжээ.