Монгол Улс, БНСУ-ын Засгийн газрын Агаарын харилцааны хэлэлцээрийн дагуу хоёр орны хоорондын агаарын харилцааны асуудлаарх ээлжит уулзалт, хэлэлцээ энэ сарын 2,3-ны өдрүүдэд Сөүл хотноо боллоо.

Хэлэлцээг Монголын талаас ЗТХЯ-ны Иргэний нисэхийн бодлогын хэрэгжилтийг зохицуулах газрын дарга Ч.Мөнхтуяа, Солонгосын талаас БНСУ-ын Газар, дэд бүтэц, тээврийн яамны Нисэхийн бодлогын газрын дарга Юүн Жин Ван нар ахлав. Хоёр тал, тус тусын Засгийн газар, Улсын онцгой комиссоос авч хэрэгжүүлж буй ажил, халдвар хамгааллын дэглэмтэй холбоотой үүсч буй асуудал, хуваарьт нислэгийг сэргээх, нислэгийн зохицуулалтын талаар санал солилцон, тохиролцож, уулзалтын дүнгээр Харилцан ойлголцлын санамж бичиг байгууллаа.

Улаанбаатар-Сөүлийн чиглэлд хоёр талаас томилогдсон агаарын тээвэрлэгчид /Монголын талаас “МИАТ” ТӨХК, солонгосын талаас Кореан Эйр, Асиана компани/ Олон улсын агаарын тээвэрлэгчдийн холбоо /IATA/-ны 2022 оны зуны цагийн хуваариас эхлэн 6-9 дүгээр сард долоо хоногийн 5000 суудлын багтаамжид Монголын тал 20, Солонгосын тал 18 удаагийн нислэг гүйцэтгэхээр болов. Мөн 5-10 дугаар сард 2500 суудлын багтаамж буюу долоо хоногт Монголын тал 11, Солонгосын тал есөн нислэг гүйцэтгэх одоогийн тохиролцоог хэвээр хадгалахаар тохиров.

Энэ удаагийн хэлэлцээгээр зуны нислэгийн багтаамжийг хоёр дахин нэмэн тохирсноор Инчеон нисэх буудлын цагийн хуваарьтай холбоотой “МИАТ” ТӨХК-д нэмэлт нислэгийн зөвшөөрлийг сар сараар олгодог байсан хүндрэлийг арилгаж, зуны оргил ачааллын үеийн суудал нийлүүлэлт долоо хоногт хоёр тал нийлээд 10 000 суудал буюу нийт 38 нислэг болж, эрт төлөвлөн гүйцэтгэх боломж бүрдлээ