Өнгөрсөн долдугаар сарын 27-ны өдөр Сайд Моллай “Токио-2020” зуны олимпоос мөнгөн медаль хүртэж, монгол түмний бахархлыг төрүүлсэн билээ. Монголчууд түүнд Молом хэмээх монгол нэр өгөөд буй. Тэгвэл түүнийг алтан медалийн төлөө барилдах тэр агшинд Архангай аймгийн Өндөр-Улаан сумын Бэлх багийн иргэн Ш.Алтантөр Б.Оюунгэрэл нар дөрөв дэх хүүгээ өлгийдөн авчээ. Улмаар Монгол Улс дэлхийн олимпоос мөнгөн медаль хүртсэн түүхэн үйл явдалтай давхцан дахин хүүтэй болсноо билэгшээн хүүдээ Б.Мөнхмолом гэх нэр хайрласан байна. Б.Мөнхмоломын ах нарыг Б.Мөнх-Амгалан, Б.Мөнх-Эрдэнэ, Б.Мөнх-Оргил гэдэг ажээ. 

             Энэхүү гэгээлэг үйл явдлын талаар Б.Оюунгэрэлээс тодруулахад “Би долдугаар сарын 27-нд Архангай аймгийн Нэгдсэн эмнэлэгт төрсөн. Яг намайг өвдөөд, төрөх ор луу гарч байхад Монгол Улсын бөх Саид Моллай Токиогийн олимпын алтан медалийн төлөө барилдаж байсан юм билээ. Харамсалтай нь Сайд Моллай маань ялагдаж, мөнгөн медаль хүртсэн байна лээ. Би сүүлд барилдааныг нь үзсэн. Миний хань, аав, ээж бүгд эмнэлгийн гадна намайг төрөхийг хүлээж байхдаа Саид Моллайн барилдааныг үзсэн гэсэн. Тэгээд аав нь хүүдээ Б.Мөнхмолом гэдэг нэр хайрласан.

Бид дөрвөн хүүтэй. Б.Мөнхмолом хүү маань одонгийн хүүхэд юм. Хүүгээ төрхөөс өмнө аав нь “ах нарынх нь нэрийн “Мөнх”-ийг оролцуулаад нэр өгнө” гэж ярьдаг байсан. Харин ийм хувь тохиолтой, сайхан нэр хүүдээ өгнө гэж бодоогүй байсан.

Манай өвөөгийн аав сум, аймагтаа нэртэй, сайн бөх байсан гэсэн. Бөхийн удамтай болохоор миний хүү эх орныхоо нэрийг гаргасан том бөх болох ерөөлтэй байх” гэлээ.