Олон улсын хүүхдийн эрхийг хамгаалах өдөр хайртай  гэр бүлээ өөрийн гарын амтат хоолоор дайлаарай. Бид танд амттай хийгээд хялбар хоолны жорыг хүргэж байна.

Нимбэгтэй цацагт хяруул

Орц:

• Цацагт хяруулын гол мах - 600 гр
• Нимбэг- нэг ширхэг
• Сонгино- дөрөв ширхэг
• Оливын тос- хоёр халбага
• Ногооны шүүс- 100 мл
• Зөгийн бал- нэг халбага
• Давс, перец- амталгаагаар

Хийх арга:
   Нимбэгний хальсыг үрж авах бөгөөд шүүсийг нь шахаж саванд хийнэ. Харин сонгиноо жижиглэн хэрчинэ. Дунд зэргийн гал дээр халаасан хайруулын тавгандаа тосоо хийж, цацагт хяруулын мах, сонгино болон нимбэгний хальсаа хийж хуурна. Үүн дээрээ нимбэгний шүүс, ногооны шүүс болон зөгийн балаа хийж, сайтар хутгаарай. 15 минут буцалгаж, болгосны дараа таваглана. Махаа будаа болон ногоотой хольж идвэл тохиромжтой.

Улаан лоолийн соустай паста

Орц:

• Сонгино- нэг ширхэг
• Лууван- нэг ширхэг
• Сармис- гурван хумс
• Оливын тос
• Савласан шош- 150 гр
• Ус
• Улаан лоолийн шүүс- 200 гр
• Гоймон- 200 гр

Хийх арга:
   Лууван, сонгино, сармис зэргээ шоо дөрвөлжин хэлбэртэй хэрчээд оливын тосонд хуурах аж. Үүндээ шошоо нэмэн 2 минут дахин хуурах бөгөөд улаан лоолийн шүүс болон усаа нэмээд сайтар хутгаарай. Мэдээж шөлөндөө гоймонгоо хийж чанах бөгөөд 10 минутын дараа гэхэд л таны хоол бэлэн болох юм. Хэрэв та хүсвэл хоолондоо бяслаг үйрүүлж өгч болно.

 Ногоотой феритата

Орц: 

• Өндөг- найман ширхэг
• Дурын хүнсний ногоо- нэг  аяга
• Үрсэн бяслаг- тал аяга
• Ургамлын тос- хоёр халбага
• Давс, хар перец

Хийх арга:
   Урьдчилаад шарах шүүгээгээ 200 хэмд халааж орхиорой. Өндгөө давс болон перецтэй хольж сайтар хутгана. Ногоогоо шоо дөрвөлжин хэрчиж,  тосондоо 2-3 минут хуурч аваад өндөгтэйгээ хольж хутгаарай. Эдгээрийгээ халаасан шарах шүүгээндээ хийж 10-12 минут байлгахад л хангалттай. Ингээд л таны хоол бэлэн болох бөгөөд та хүссэн ногоогоороо амталж идэх боломжтой.

 Амтат төмс

Орц:

• Төмс- 900 гр
• Цагаан цуу- нэг аяга
• Давс- нэг халбага
• Масло- хоёр халбага
• Хар перец- нэг чимх
• Сармис- хоёр хумс

Хийх арга:

  Төмсөө зузаан, тахир хэлбэртэй хэрчинэ. Сармисаа хальслаад мөн хэрчээрэй. Төмс, аяга цагаан цуу, халбага давс зэргээ нийлүүлэн тогоонд хийгээд дээрээс нь бага зэрэг ус хийж буцалгаарай. 20-25 минут гал дээр байлгахад ерөнхийдөө болно. Хайруулын тавгаа халааж, масло хийх бөгөөд чанасан төмсөө шарж, давс, перецээр амтлан 8-10 минут болоорой.

Төмс, хулуутай тахианы гуя

Орц:

• Төмс- гурван ширхэг
• Хулуу- 150 гр
• Тахианы мөч- 600 гр
• Оливын тос
• Давс, перец
• Гич- дөрвөн халбага
• Сонгино- нэг ширхэг

Хийх арга:
   Сонгиноо жижиглэн хэрчинэ. Үүндээ гич, хоёр халбага оливын тос нэмж, тахианы мөчөө амтлах юм. Махаа 20-30 минут битүү тагтай саванд хийж байлгаарай. Төмсөө дугуй, хулуугаа шоо дөрвөлжин хэрчих юм шүү. Эдгээрийгээ шарах шүүгээний тавиур дээр өрж тавин, давс, перец болон оливын тосоор амтлах хэрэгтэй. Харин үүний дээрээс тахианы мөчөө тавьж, 190 хэмд 30-40 минут байлгана.

Ази маягийн амтат салат

Орц:

• Напа байцаа- 150 гр
• Тахианы гол мах- 60 гр
• Лууван- 60 гр
• Ногоон сонгино- гурван салаа
• Цагаан гаа- хоёр см
• Халуун чинжүү- дөрвөн ширхэг
• Элсэн чихэр- нэг халбага
• Шар буурцагны соус- 3 халбага
• Ургамлын тос- нэг халбага
• Цагаан цуу-  нэг халбага

Хийх арга:
   Цагаан цуу, шар буурцагны соус, элсэн чихэр, ургамлын тосоо сайтар хольж, хутгана. Байцаа, луувангаа нарийн, тахианы махаа жижиглэн хэрчинэ. Халуун чинжүүгээ цэвэрлэн жижиглэж, ногоон сонгиноо 3 см хэмжээтэй хэрчиж бэлтгээрэй. Харин цагаан гаагаа жижиглэн үрэх бөгөөд орцнуудаа бүгдийг нь нийлүүлэн өмнө бэлтгэсэн хольцоороо базах юм.

 Бүрж шарсан загас

Орц:

• Өндөг- хоёр ширхэг
• Талхны үйрмэг - хоёр аяга
• Ширхэгтэй гурил - аяганы дөрөвний нэг
• Ургамлын тос
• Хальбин загас эсвэл сагамхай загас- 450 гр
• Давс, перец- амталгаагаар

Хийх арга:
   Өндгөө хагалж, аяганд хийгээд сайтар хутгана. Харин талхны үйрмэг болон гурилаа тус тусад нь аяганд хийж авна. Загасаа давс, перецээр амтлаад урт нарийн хэрчих юм шүү. Эхлээд гурилтай аяганд, дараа нь өндөг, харин хамгийн сүүлд талхны үйрмэгтээ загасаа өнхрүүлээд үүнийгээ ургамлын тосонд 3 минут хэртэй шарж болгоорой.