Тажикстан Улсад жүдо бөхийн Душанбегийн "Гран-при -2023" тэмцээн маргааш эхэлнэ. Тус улс анх удаа гран при тэмцээнийг зургадугаар сарын 2-4-ний өдрүүдэд зохион байгуулан явуулна. Энэ удаагийн гран при тэмцээнд 41 орны эрэгтэй 168, эмэгтэй 133, нийт 301 тамирчин өрсөлдөх мэдүүлэг өгсөн байна. Манай улсаас тус гран при тэмцээнд оролцохоор 20 хүний бүрэлдэхүүнтэй баг, тамирчид  Душанбед буужээ.

           Эрэгтэйчүүдийн 60 кг-ын жинд 26 бөх барилдах мэдүүлэг өгсөн байна. Манай улсаас Б.Цогт-Очир, К.Ёолк нар хүч үзнэ. 66 кг-ын жинд 28 тамирчин барилдана. Энэ жинд Г.Сод-Эрдэнэ, Л.Өнөболд нар барилдах юм. Харин 66 кг-д Арабын Нэгдсэн Эмират Улсын нэрийн өмнөөс Баянмөнхийн Нармандах анхны барилдаанаа хийнэ. 73 кг-ын жинд 33 бөх барилдах мэдүүлэг өгчээ. Манай улсаас О.Уранбаяр, Л.Өсөхжаргал нар хүч сорино.

           Эрэгтэйчүүдийн 81 кг-ын жинд 27 тамирчин барилдах юм. Тус жинд манай улсаас Г.Болор-Очир барилдана. 90 кг-д 19 тамирчин байна. Манай улсаас энэ жинд бөх барилдахгүй. -100 кг-ын жинд 18 бөх байгаа. Манай улсаас Б.Гончигсүрэн “А” хэсгийг толгойлон барилдах боломжтой байгаа юм. +100 кг-ын жинд 17 тамирчин барилдана. Энэ жинд манай улсаас бөх барилдахгүй.

           Эмэгтэйчүүдийн 48 кг-ын жинд 21 бөх барилдах мэдүүлэг өгсөн байна. Манай улсаас Г.Наранцэцэг “А” хэсгийг,  Б.Баасанхүү “В” хэсгийг тэргүүлэн барилдах чансааны эрэмбэтэй байгаа. 52 кг-ын жинд 21 тамирчин барилдах мэдүүлэг өгсөн байна. Энэ жинд манай улсаас бөх барилдахгүй. Харин Арабын Нэгдсэн Эмират Улсын нэр дээр ОУХМ Бишрэлтийн Хорлоодой анхны барилдаанаа хийнэ.

            Эмэгтэйчүүдийн 57 кг-ын жинд 23 бөх барилдах юм. Энэ жинд залуу тамирчин О.Оюунчимэг барилдана. Мөн АНЭУ-ын өмнөөс ОУХМ Батсүхийн Алтанцэцэг ээлжит барилдаанаа хийх юм. 63 кг-ын жинд  18 тамирчин барилдах мэдүүлэг өгсөн байна. Манай улсаас энэ жинд өсвөрийн тамирчин Д.Есүй барилдана. Мөн ОУХМ М.Ичинхорлоо 57 кг-аас жин өгсөн 63 кг-д барилдах мэдүүлэг өгчээ.

            Эмэгтэйчүүдийн 70 кг-ын жинд 18 тамирчин барилдана. Манай улсаас энэ жинд Б.Баасанжаргал барилдана. Мөн С.Лхагвадулам 63 кг-аас жин өгсөн 70 кг-д анх удаа барилдах юм. -78 кг-ын жинд 17 бөх барилдах мэдүүлэг өгсөн байна. Манай улсаас тус жинд О.Хүслэн, Б. Эрдэнэт-Од нар барилдана. +78 кг-ын жинд 15 тамирчин барилдах мэдүүлэг өгсөн байна. Тус жингийн бөхчүүдийг  ОУХМ А.Адъяасүрэн чансаагаар тэргүүлж байгаа учир “А” хэсгийг толгойлон барилдах болов уу. Энэ жинд манай улсаас ОУХМ А.Адъяасүрэн, Д.Номинзул нар хүч сорино.