Сагсан бөмбөгийн 3х3 ДАШТ-д оролцож буй Монголын эрэгтэй шигшээ эхний тоглолтоо Унгарын эсрэг хийлээ. Манай өрсөлдөгч Унгар энэ тэмцээнд чансааны 19-д эрэмбэлэгдсэн бөгөөд өмнө нь 2016 оны ДАШТ-д оролцож Филиппин, Румын, Польшийн багийг хожин шөвгийн наймд шалгарч байсан туршлагатай баг байв.

         Харин манай эрэгтэй шигшээгийн хувьд сүүлийн дөрвөн ДАШТ-д дараалан оролцож буй, 2018 онд хэсгээсээ гарч, шөвгийн наймд өрсөлдсөн намтартай. Энэ удаагийн тоглолтод Монголын баг ширүүн өрсөлдөөний эцэст 21:19-өөр ялалт байгуулж, ДАШТ-ий эхний хожлоо авлаа. Манай залуус эхнээсээ оноогоор хоцорч, тав хүртэл оноогоор хожигдож байсан ч төгсгөлөө сайн хийж чадав. А.Ананд багийнхаа нийт онооны талаас илүүг (12) авсан бол Д.Дэлгэрням дөрөв, Ц.Отгонжаргал гурав, О.Энхбаатар хоёр оноо авсан байна. Одоо Монголын шигшээ 20 цагаас Нидерландын эсрэг тоглох болно.