Монголын шатрын холбоо хоёр сарын өмнө “Тэнгэрийн түүх медиа” групптэй хамтран “Шатрын хүрээлэн” төслийг хэрэгжүүлж эхлэх гэж байгаагаа зарлаж байв. “UG arena” хүрээлэнд нэвтрүүлэхээр төлөвлөж байгаа уг төсөлд тус бүр нь таван хүний бүрэлдэхүүнтэй хоёр баг оролцож, гурван метр хүртэлх өндөртэй шатраар 15х15 минутын хугацаатай тоглоно гэдгийг танилцуулж байсан билээ.

         Тэгвэл оюун ухааны спорт болох шатрыг багаар тоглох уг төслийн нэгдүгээр шатны найман баг хэдийнэ бүрджээ. Төслийн бичлэгийг зургаадугаар сарын 4-нд “UG Arena”-д хийхээр төлөвлөсөн бөгөөд нийт 11 өрөг тоглох юм байна. Нийт шагналын сан 60 сая төгрөг бөгөөд хамтран зохион байгуулагч МҮОНРТ улсын баяр наадмаас өмнө үзэгчдэд хүргэхээр болжээ.

            “Шатрын хүрээлэн” төсөл нь зөвхөн Монгол Улсад төдийгүй олон улсад нэвтрэн хэрэгжих боломжтой бөгөөд хөл бөмбөгийн талбай, сагсан бөмбөгийн талбай гэхчилэн орон зайн алинд ч хувиран тоглож болох томсгосон хэлбэртэй шатраар өрсөлдөх аж. Монгол оюун сэтгэлгээг дэлхийд таниулах зорилготой энэ төсөл дээр “Монос” групп, “Шатрын хүрээлэн”-тэй хамтран ажиллахаар болж, эхний хамтран ажиллах гэрээг хийж, гарын үсэг зурсан.

          Дашрамд дурдахад Азийн шатрын холбооны ерөнхийлөгч Шейх Султан Бин Халифа Монголын шатрын холбооны ерөнхийлөгч Э.Гурванбаатарыг шатрын Зүүн Азийн бүсийг хариуцсан ерөнхийлөгчийн зөвлөхөөр өнгөрсөн сард томилсон. Ийнхүү Ази тивийн шатрын спортын хөгжлийг тодорхойлоход манай улс санал өгөх, нөлөө үзүүлэх боломжтой болсон нь сайшаалтай.