Монголын  чөлөөт бөхчүүдээс гавьяат тамирчин О.Насанбурмаа хамгийн олон удаа дэлхийн аварга шалгаруулах тэмцээнд оролцож, хамгийн олон медаль хүртсэн түүхэн амжилтын эзэн мөн билээ. Тэрбээр Гуанжоу 2006, Токио 2008, Москва 2010, Станбул 2011, Страткон 2012, Будапешт 2013, Ташкент 2014, Лас-Вегас 2015, Парис 2017, Будапешт 2018 дэлхийн аварга шалгаруулах тэмцээнд оролцож  нэг мөнгө, гурван хүрэл медаль хүртсэн цорын ганц бөх.

      Түүнийг Унгарын Будапештын дэвжээнээс дэлхийн аваргын гурав дахь хүрэл медалиа хүртэх тэр агшинд спортын сэтгүүлч, тайлбарлагч С.Шижирбат “Дэлхийн аваргаас гурван дахь медалиа хүртэнэ гэдэг амаргүй их хөдөлмөр, олон жилийн уйгагүй хичээл зүтгэл, авьяас чадварын үр дүн мөн.  Дэлхийн аваргаас медаль хүртэнэ гэдэг бөмбөрцгийн бөхчүүдийн хийдэг ажил” хэмээн дуу алдан тайлбар хийж байлаа.

       Үнэхээр гавьяат тамирчин О.Насанбурмаа гайхамшигтай амжилт гаргасан бөх. Тэрбээр 2004, 2005, 2006 оны өсвөр үеийн Ази тивийн аварга шалгаруулах тэмцээнээс дараалан алт, мөнгө, хүрэл медаль хүртэж байв. Улмаар 2005-2008 онуудад залуучуудын Ази тивийн аварга шалгаруулах тэмцээнээс алт, мөнгө, хүрэл медаль хүртэж, 2007, 2008 онд залуучуудын дэлхийн аваргаас мөнгө, хүрэл медаль хүртэж байлаа. Тийм ч учраас түүнийг дэлхийн шигшээ багийн бүрэлдэхүүнд багтааж ОХУ-ын шигшээ багтай өрсөлдөх халз тулаанд орохыг хүссэн урилгыг “FILA” –аас илгээж байв.

-ХҮНДИЙН ӨРГӨЛТӨӨС ЧӨЛӨӨТ БӨХ РҮҮ ОРСОН НЬ-

         Самбо, жүдо, чөлөөт бөхийн төрлөөс хүндийн өргөлт, фитнес, хүчний гурван төрөлтийн спорт  руу шилжсэн шилдэг тамирчид нэлээдгүй байдаг. Харин хүндийн өргөлтийн спортоос чөлөөт бөх рүү шилжсэн цорын ганц гэж хэлж болох тамирчин бол О.Насанбурмаа юм. Спорт сонирхогчид гавьяат дасаглжуулагч Т.Сүхбаатар багшийн хоёр шавь Очирбатын Насанбурмаа, гавьяат тамирчин Очирбатын.Бурмаа нарыг  төрсөн эгч, дүүс хэмээн андуурах нь бий . Тэднийг “Том Бурмаа”, “Жижиг Бурмаа” хэмээн ялган дуудах нь ч байдаг .

          О.Насанбурмаагийн чөлөөт бөхийн спорттой амьдралаа холбосон түүх их сонин. Түүний төрсөн эгч О.Мягмарсүрэн чөлөөт бөхөөр хичээллэдэг байж. Харин О.Насанбурмаад хүндийн өргөлтийн спорт их сонирхолтой, сайхан санагддаг байсан гэдэг. Тэгээд өөрийн сонирхлын дагуу 13 настай байхдаа хүндийн өргөлтийн спортоор хичээллэж эхэлжээ. Хичээллээд нэг их удалгүй өсвөр үеийн УАШТ-нд оролцсон байна. Тэр тэмцээнээс мөнгө, хүрэл медаль хүртэж “Магнайгаа тэнийтэл” баярласан аж. Гэтэл гавьяат дасгалжуулагч  С.Хөхөө багш нь баярласангүй. О.Насанбурмаагийн хүч, чадал, нөөц боломжийг мэдэрсэн С.Хөхөө багшид түүний гаргасан амжилт чамлалттай санагдсан бололтой. С.Хөхөө багш “Чи алтан медаль хүртэх боломжоо ашиглаж чадсангүй. Чамд чадал, хүч тэнхээ байсан үүнийгээ яагаад гаргасангүй вэ” гээд “Толгойг нь эргэтэл” загнажээ.  Дасгалжуулагчаасаа урмын үг хүлээж байсан балчир охины сэтгэл зүйд энэ нь хүндээр туссан байна. Тэрбээр гэртээ тэмцээнээс медаль хүртэн баяр, хөөртэй ирсэнгүй. Харин сэтгэл гонсгор, уруу царайлан ирсэн аж.

          Тэр үед түүний эгч  О.Мягмарсүрэн дүүгээ хараад аргадан, эгч хүний халуун дулаан хайр, урмын үг хайрлажээ. Эгч нь “Миний дүү ямар их хүчтэй юм бэ. Ийм их хүч тэнхээтэй юм чинь чөлөөт бөхөөр хичээллэвэл илүү их том амжилт гаргана шүү дээ” хэмээн аргадан, ятгаж, зөвлөж л дээ. Тэгээд л О.Насанбурмаа эгчийнхээ үгэнд орж 2003 онд МУГД  Т.Сүхбаатар, Т.Дамбарагчаа нарын шавь болжээ. Ийнхүү О.Насанбурмаа гавьяатын чөлөөт бөхийн спортод хөл тавин орж ирсэн түүх эхэлжээ.

-ЭГЧИЙН ХАЙР, АМЖИЛТЫН ЭХЛЭЛ-

          О.Насанбурмаа “Эгч маань намайг өдий зэрэгтэй бөх болоход их хувь нэмэр болсон. Анх бөхийн секцэнд ороод эгчтэйгээ цуг бэлтгэл сургуулилалт хийдэг байлаа. Мэдэхгүй, чадахгүй байгаа бүхнийг эгч маань хажуугаас хараад зөвлөнө. Эгч маань өөрийнхөө бэлтгэлээ үл хайхран, хамаг анхаарлаа надад хандуулан алдаа дутагдал бүрийг минь засаж өгдөг байсан шүү” хэмээн дурсан ярьж байв. Тамирчин хүний амжилт гаргах гол тулгуур нь мэдээж багш байдаг. О.Насанбурмаагийн тив, дэлхийн хэмжээнд гаргасан эдгээр амжилтууд түүний багш МУГД  Т.Сүхбаатар багштай салшгүй холбоотой. 2008 онд Токиогийн дэлхийн аваргаас анхны хүрэл медалиа хүртэж ирээд надад ярилцлага өгөхдөө “Т.Сүхбаатар багштайгаа дэлхийн аварга шалгаруулах тэмцээнд цуг явсан учраас энэ медалийг хүртэж чадлаа. Дэвжээний хажуугаас багш ямар мэх хийх, яаж барилдах тактикийг хэлж өгч байв. Өөрийн анхны гарын багштайгаа яваа тамирчин бусдаас илүү давуу талтай байдаг юм билээ” гэж  ярьж байсан билээ.

-ТҮҮНИЙ ДАРААГИЙН ЗОРИЛГО ЛОНДОН 2012 ОЛИМПЫН НААДАМ БАЙВ-

      О.Насанбурмаа гавьяат дэлхийн аваргаас хоёр дахь хүрэл медалиа хүртээд дараагийн зорилгоо Лондонгийн олимпын наадам хэмээн тодорхойлж байв. Тэрбээр ДАШТ-д амжилттай барилдаж,  “Лондон 2012” олимпод оролцох болзолыг хангасан. Гэтэл Монголын чөлөөт бөхийн холбооны удирдлагууд түүний оронд 59 кг-ын жингийн дэлхийн аварга, гавьяат тамирчин С.Батцэцэгийг жин өгсүүлэн, ямар ч сорилт тэмцээн хийхгүйгээр  63 кг-ын жинд Лондонгийн олимпын наадамд оролцуулах хачирхалтай нэгэн шийдвэр гаргаж байлаа.

           Энэ шийдвэр О.Насанбурмаад маш хүнд туссан. Олон жилийн хүсэл мөрөөдөл, хөдөлмөр нь “Салхинд хийсэх” шиг л болжээ. Сэтгэл, санаагаар унасан. Эд амжилт гаргах боломжтой бэлтэлжилт нь жигдэрсэн оргил үед нь түүний урмыг хугалж, хүсэл тэмүүлэл, мөрөөдлийг нь МЧБА-ны удирдлагууд үгүй хийсэн юм.  

-СПОРТОО ОРХИХ БОДЛЫГ НЬ СҮХЭЭ БАГШ ЗОГСООЖЭЭ-

             Тамирчин бүхний мөрөөдөл, зорилго олимпын наадам байдаг. О.Насанбурмаагийн олимпод оролцох мөрөөдөл үгүй болсон нь түүнд хүнд цохилт болжээ.  Монголын чөлөөт бөхийн холбоо “Урмыг нь нугалхаар ууцыг нь хугал “ зүйр үгийг умартаад л өнгөрөв.  Энэ бүхнээс болоод  О.Насанбурмаа гавьяат чөлөөт бөхөө орхих, зодог тайлахаар бодох болжээ. Энэ тухай бодлоо Т.Сүхбаатар багшдаа дуулгасан байна.  Харин Т.Сүхбаатар багш  ”За Ука минь, чи үнэхээр хүчээ шавхан байж ДАШТ-ээс Лондон 2012 олимпын эрхийг авсан. Чөлөөт бөхийн холбооны шийдвэрийг чи, бид хоёр өөрчилж чадахгүй. Ингэж зовж зүдэрч, амжилт гаргачихаад, ид амжилт гаргах оргил үе дээрээ спортоо орхиж, болих шиг амархан зүйл байхгүй. Уг нь чи эцсийн мөч хүртлээ энэ спортоороо хичээллэх ёстой. Олимп нэгээр дуусахгүй гэж хэлжээ. Яг үнэндээ бол олимпын дөрвөн жилд нэг удаа болдог. Их урт удаан хугацаа, дөрвөн жил оргил амжилтаа хадгалж барина гэж бараг л байхгүй, хэцүү зүйл. О.Насанбурмааг зодог тайлуулахгүйн тулд Т.Сүхбаатар багш тэгж хэлжээ.

       Лондон 2012 олимпын өмнөх жилүүдийн УАШТ-ний 63 кг-ын жингийн аваргын төлөө дэлхийн аварга С.Батцэцэг, О.Насанбурмаа нар хоёр удаа тааран барилдсан юм. Тэд хоёр биенээ ээлжлэн ялсан байдаг. Тийм ч учраас тэнцүүхэн хоёр өрсөлдөгчийн хэнийг нь ч олимпод явуулсан ч ижил амжилт гаргах магадлал өндөр байв.  Ингээд О.Насанбурмаа Лондонгийн олимпод өөрийн жинд, 59 кг-ын жингийн дэлхийн аварга С.Батцэцэгийг үдэн мордуулж “Дээлийн захыг нь мушгин” амжилт хүсэн хүлээж суухаас өөр аргагүй болсон юм. С.Батцэцэг гавьяат энэ итгэл найдварыг нь алдалгүй Лондонгийн олимпоос хүрэл медаль хүртсэн билээ.

-ТҮҮХЭН АМЖИЛТ ГАРГАСАН  БУДАПЕШТЫН ДЭЛХИЙН АВАРГА-

     Унгар Улсын Будапешт хотод 2013 онд болсон  чөлөөт бөхийн насанд хүрэгчдийн ДАШТ-нд монголын эмэгтэй бөхчүүд түүхэн амжилт гаргасан юм. Манай эмэгтэй бөхчүүд дэлхийн аваргаас таван медаль хүртэж багийн дүнгээр дэлхийд хоёрдугаар байрт шалгарав. Тус дэлхийн аварга О.Насанбурмаа  гавьяат жин өгсөн 67 кг-ын  жинд дэлхийн аваргын гурав дахь хүрэл медалиа хүртсэн. Тэрбээр медалийн өнгөө хувиргах бүрэн боломжоо сүүлийн хэдхэн хоромд алдсан юм. Өрсөлдөгч бөхөө оноогоор хожиж яваад тактикийн алдаа гарган оноо алдаж, хүрэл медалийн төлөө өрсөлдөх эрхтэй үлдэж байлаа.

     Харин хүрэл медалийн төлөө барилдаанд өмнө гаргасан алдаагаа давталгүй хянуур барилдан медаль хүртэж монгол түмнээ баярлуулсан юм. Ер нь О.Насанбурмаа сэтгэлийн хөдөлгөөн ихтэй ч сэтгэлийн тэнхээтэй. Хортой, шартай,  өөртөө итгэлтэй, сэтгэлийн хүсэл тэмүүлэлтэй байж чаддаг учраас энэ их амжилтуудыг гаргаж чадсан билээ. Бэртэл гэмтэл нь түүний амжилтыг хойш нь татсан. Түүний  эгэм, хоёр хөл нь хугарсан ч тэр шанатарч мохолгүй дэвжээндээ эргэн ирсэн юм.  Хүнд хагалгаанд орох үед нь олон хүн түүнийг “ Одоо барилдах ямар ч боломжгүй боллоо. Ийм хүнд хагалгааны дараах нөхөн сэргээлт удаан, бэлтгэл сургуулилалт хийх болохгүй” гэцгээж байлаа. Гэтэл О.Насанбурмаа тэр бүхнийг биеэрээ даван туулж бөхийн спортдоо эргэн ирсэн юм. Баргийн хүнээс тэр болгон гараад байхгүй тэсвэр, тэвчээр заан,  хүнд бэрхшээлийг даван туулж 2018 онд ДАШТ-д 72 кг-ын жинд Унгарын Николетта Смольскаг 10:0-ээр, Туркийн Бусе Тосуныг 7:6-аар, БНХАУ-ын Хуан Вангийг 6:0-ээр ялж шигшээд үлдсэн юм. Тэрбээр  Канадын Жустина Ренай Ди Стасиотой алтан медалийн төлөө барилдаж, мөнгөн медаль хүртэж байв. Дэлхийн аваргаас 63, 67, 72 кг гэсэн гурван өөр жинд дөрвөн медаль хүртсэн гэдэг бахархалтай. О.Насанбурмаа гавьяат монголын чөлөөт бөхийн болон дэлхийн чөлөөт бөхийн түүхэнд тод мөрөө гаргаж чадсан бөмбөрцгийн бөх  яах аргагүй мөн билээ.