Найруулагч Л.Номингийн бүтээл "Хүрд" баримтат кино нь дэлхийн нэр хүндтэй IDFA буюу Амстердамын олон улсын баримтат кино наадмаас "дунд хэмжээний урттай" кино төрөлд шагнал гардлаа. Нидерланд Улсын Амстердам хотноо зохион байгуулагдсан уг наадамд өнгөрсөн 21-ны өдөр үзэгчдэд уг бүтээлийг толилуулжээ. 

Уг бүтээлд  гарах таван дүр таван өөр амьдралтай. Эмэгтэй, эрэгтэй болоод бүгд өөр насны хүмүүс. Гэхдээ тэднийг ялгалгүйгээр нэгэн аймшигт харанга дайрсан нь Монголын нийгэмд мэр сэр сонсогдох боловч тэр болгон яригдаад байдаггүй нэгэн үзэгдэл аж. Тэр нь амиа егүүтгэл. Монгол улс өдгөө амиа егүүтгэл өндөр улс орны тоонд хэдийнээ багтжээ. Энэ тухай найруулагч Л.Номин уг бүтээлдээ хөндөж, эрэл хайгуул хийжээ.