Боловсролын сайд П.Наранбаярыг өчигдөр мэдээлэл хийх үеэр “Үнэн ба Зөв” намын гишүүн А.Отгонбаатар түүн рүү өндөг шидэж, эсэргүүцлээ илэрхийлсэн.

Улмаар Боловсролын сайдын хэвлэлийн төлөөлөгч Т.Отгонбаатар сайдаа хамгаалж, зодолдсон бичлэг олон нийтийн сүлжээнд цацагдаад байгаа юм. Энэ асуудлаар бид Боловсролын яамны хэвлэлийн төлөөлөгч Т.Отгонбаатартай холбогдож дараах тодруулгыг авлаа. Тэрбээр “Өчигдөр болсон үйл явдалтай холбоотой бид цагдаагийн байгууллагад ямар нэг гомдол гаргаагүй. Харин цагдаагийн байгууллага тухайн үйлдэлд хэрэг нээн шалгасан юм билээ. Сайдыг болон намайг дуудаж мэдүүлэг авсан. Харин бид гомдол, саналгүй гэж хэлсэн.

Харин над дээр ирсэн гомдол одоогоор байхгүй байна. Өчигдөр болсон зодооны үеэр би биеэ хамгаалсан. Гэтэл дахин сайдын биед халдах гэж оролдсон учраас би хариу үйлдэл үзүүлсэн. Дараа нь тэр хүн өөрөө над руу халдсан. Ингээд хамгаалалтынхан орж ирээд аваад гарсан” гэлээ.