Засгийн газрын хуралдаанаас гаргасан шийдвэрүүдийг танилцуулж байна. Энэ үеэр Сангийн сайд Б.Жавхлан мэдээлэл өглөө.

    Тэрбээр “Дорноговь аймагт байрлах Газрын тос боловсруулах үйлдвэрийг хэрхэн хэвийн үйл ажиллагааг хэвийн байлгах тал дээр Ерөнхий сайд ба түүний багийнхан газар дээр нь арга хэмжээ авч ажилласан. Үүнийгээ өнөөдөр Засгийн газрын шийдвэр болгон баталгаажуулж байна. 2016 онд АСЕМ-ийн үеэр Энэтхэг Улсын талаас Газрын тос боловсруулах үйлдвэрийн санхүүжилтэд нэг тэрбум доллар өгөхөөр амлаж байсан. Ингээд 2019 онд УИХ-аар нэг тэрбум 236 сая долларын зээлийг баталсан. Харамсалтай нь цар тахлын үед ажил хэвийн явагдаж чадаагүй, 112 сая төгрөгийн зээл л авсан. Гэтэл бид гэрээгээрээ аваагүй зээлээ хүүтэй нь төлж эхлэх шаардлага үүсээд байгаа. Бид таван сарын хугацаанд хэлэлцээр хийж, гэрээний өөрчлөлтөө амжилттай хийж чадсан. Цаашдаа Газрын тос боловсруулах үйлдвэрийн үйл ажиллагаа явагдана” гэлээ.