“Нүүрсний” гэх тодотголтой хэрэгт яллагдагчаар татагдсан УИХ-ын гишүүн асан, ХНХ-ын сайд асан Т.Аюурсайхан, "Эрдэнэс Тавантолгой"-н Гүйцэтгэх захирал асан Б.Ганхуяг нарын 11 хүнд холбогдох хэргийн урьдчилсан хэлэлцүүлгийн шүүх хурал өнөөдөр болж буй.

Энэ үеэр яллагдагч Б.Ганхуяг шүүхээс татгалзах санал гаргаж, үг хэллээ.

     Тэрбээр “Монгол Улсын хууль, шүүхийн хараат бус байдалтай, бие даасан байх зарчмыг би яриад  байгаа юм. Өмнө нь хонгилын шүүгч нар гэж байсан. Одоо барьцаалагдсан шүүгч нар гэж байх боллоо. Эхлээд АТГ-аас бичгээ аваач,  та нарыг барьцаалагдаагүй гэдгийг би яаж мэдэх вэ. Би есөн сар хоригдлоо, дахиад гаргахгүй юм байна. Намайг гаргаж ард түмэнд үгийг минь сонсохгүй, энд байлгах сонирхолтой хүмүүс байсан хэвээрээ л байгаа.  Надад шүүгч нарын АТГ-аас авсан бичиг хэрэгтэй, дараа нь би үгээ хэлмээр байна. Тийм учраас би Чингэлтэй дүүргийн нийт шүүгчдээс татгалзаж байна. Надад жорлонгийн хэрэг тохчихоод ард нь та нар үлдэх юм уу. Эдийн засгийн сайд Ч.Хүрэлбаатар Солонгост орд зарсныхаа хариуд мөнгийг нь над дээр бичих юм уу. Түүнийгээ бүгдийг нь бичээд аваад ир. Эцэггүй хүүхэд байсан ч аваад ир.

Би хилс хэрэгт хэлмэгдэхгүй. Надад зургаан үйлдэл байгаа. Энэ нь хүн танилцуулсан л асуудал юм. Энэ 11 хүн намайг болон Б.Халиун таныг улс төрийг золиос болгочихлоо. Би энд золиослогдож, тэд засаг, тамга, төртэйгөө үлдэж болохгүй. “Эзнийг нь барьчихлаа” гээд ард түмний жагсаалыг хулхидаж тараасан. Энэ төслүүдийн эзэн нь Т.Аюурсайхан биш. Энд яг юу хийж сууж байгаа юм. Надтай хэсэг найзалсны төлөө энд сууж байгаа бол бүгдийг нь аваад ир.  Тэгвэл 76-уулаа энд сууя.  

Би АТГ-д бүгдийг нь хэлсэн. Одоо тэр бүгд хаана байна, дараад өнгөрөх юм уу.  Жагсаалын үеэр 68 хүн орж ирсэн. Одоо би ганцаараа байна. Намайг байлга. Би гарах юм бол олон хүний зүрх зогсох гээд байна. УИХ, Засгийн газар над руу тэр чигээрээ дайрлаа.  Би есөн сар чимээгүй байлаа. Айж байгаа болохоороо намайг яриулахгүй байна” гэлээ.

Тэгвэл шүүхээс Б.Ганхуягийн Ерөнхий шүүгчээс татгалзах хүсэлтийг хангахаас татгалзаж шийдвэрлэснээр хуралдаан завсарлаад байна.