Засгийн газрын ээлжит хуралдаанаар хэлэлцсэн асуудлын талаар мэдээлэл хийж байна.

Эдийн засгийн хөгжлийн сайд Ч.Хүрэлбаатар валютын нөөцийг нэмэгдүүлэх талаар Засгийн газраас авч хэрэгжүүлж байгаа арга хэмжээний талаар мэдээлэл өгсөн. Мөн энэ үеэр уул уурхайн бүтээгдэхүүнээс гадна бусад төрлийн экспортын асуудал, хөдөө аж ахуйн бүтээгдэхүүнийг арилжаалахад ямар арга хэмжээ авч байгаа талаар тэрбээр байр сууриа илэрхийллээ.

Тэрбээр “Хөдөө аж ахуйн салбар, хөдөө аж ахуйн салбарын экспорт дээр том ухралт 2014 онд гарсан. Ингэхдээ арьс ширийг хилээр гаргахгүй дотооддоо боловсруулаад эхэлбэл дотоод үйлдвэр баригдана гэсэн шийдвэр Н.Алтанхуягийн Засгийн газрын үед "Женко" Х.Баттулгыг Хөдөө аж ахуйн сайд байхад гарч байлаа. Ингээд хөдөө аж ахуйн экспортыг бүрэн зогсоож, арьс шир үнэгүйдэж эхэлсэн. Энэ хугацаанд нэг ч арьс ширний үйлдвэр баригдаагүй. Харин Л.Оюун-Эрдэнийн Засгийн газар энэ бүх шийдвэрийг цуцалж, өнгөрсөн жилээс боловсруулсан ноолуур гаргах зүйтэй гэж үзсэн. Энэ жил ноолуур харьцангүй өндөр үнэтэй байна. Махны үнэ бас нэмэгдсэн” гэлээ.