Хэдэн дарга нарынхаа хазгай буруу үгийг нь засаж ойлгох нэг ажил нэмэгдэв бидэнд. Сүүлдээ өрөвдсөөр өрөвдсөөр өр өшиглөнө  гэгч л болж байна даа тэд. Зарим нь бүр цагаандаа гарч, сав л хийвэл ард түмнээ доромжилж, сүүлдээ түүнийгээ хошигнол гэх нэрээр хайцаалаад өнгөрдөг боллоо. Уг нь тэднийг төрийн түшээд, түмнээ удирдах алба хаагч гэж шалгаруулж, сонгож,  ард түмэн дотроос шилж томилдог билээ.

      Гэтэл тэднээс манлайлал, төрийн алба хаагчийн ёс суртахуун гэж хүлээгээд ч нэмэр алга.  Тэр байтугай иргэдээ хамгаалах, нийгмийн хамгийн том үүрэг хүлээсэн Хөдөлмөр хамгааллын  яамны алба хаагчид нь хоорондоо ард түмнээ "ул"-ны гэж доромжлоод түүнийгээ албан нэршил болгочихсон жишээ байдгийг сануулж сайд нар нь ам алдаж, албан тушаалаасаа хөөгдөж байлаа. Түүнчлэн баруунд боловсрол эзэмшсэн залуу боловсон хүчин хэмээн хэсэгтэй л доторч явсан ЦХХХ-ны сайд Н.Болор-Эрдэнэ тэтгэвэртээ гарахад хэдхэн жил дутуу хууччуулыг “Хөгшин, хуучин Зөвлөлтийн боловсролтой, хамтарч ажиллах хэцүү” гэж доромжлоод ажлаа өгсөн түүхтэй. Тэгвэл ажлаа өгөх алдаа дутагдалтай дарга нар ар араасаа гарсаар байна даа.

   Тухайлбал, хамгийн сүүлд баруунд боловсролтой, бараг монгол хэл мэдэхгүй болтлоо гаднын улсад суралцсан гэх МҮОХ-ны Ерөнхийлөгч Б.Баттүшиг Зүүн Азийн залуучуудын наадмыг нээж үг хэлэхдээ алдаа гаргаж, Азиудын өмнө Монголыг шившиглэв. Түүний араас УИХ-ын гишүүн Г.Дамдиннямм дунд эргэм насныхныг басамжилж, доромжилсон үйлдлээ цахим орчинд илэрхийлэв. Энэ мэт ёс зүйн алдаа гаргасан гишүүддээ хариуцлага тооцдог баймаар байна.

     Зүүн азийн залуучуудын наадмын нээлтийн үеэр МҮОХ-ны ерөнхийлөгч Б.Баттүшиг мэндчилгээ дэвшүүлж, олны шүүмжлэлийг дагуулаад байна. Угтаа тэрбээр Чикагогийн Их Сургууль, Харвардын Бизнесийн Сургууль зэрэг дэлхийн топ сургуулиудыг дүүргэж, Морган Стэнли, Голдман Сакс зэрэг томоохон корпорацуудад ажиллаж байсан гэх. 

    Гэтэл дунд ангийн хүүхэд ч англи хэлээр эвлэгхэн хэлж чадах, хэдхэн тоог хэлж  чадсангүй.  Тэгэхдээ бүр хоёр хэл холиод 2023 оныг "20, 23" хэмээн монголоор хэлж, англи хэлийг  төрөлх хэл шигээ эзэмшсэн гэх түүний мэдлэг дөрөвхөн оронтой тоонд бүдэрчихлээ. Хоёр хэл хольж, сольж мэндчилгээ дэвшүүлсэн тэрбээр барууны боловсролынхоо гавъяаг ч гаргаж чадсангүй тайзнаас буув.

Харин сүүлд нь олны шүүмжлэлд өртөв үү, үгүй юү тайзнаас буугаад зохион байгуулагч нарт англиар ярилцлага өгч, өөрийгөө өмгөөлөх гэж үзэв. Түүгээр ч зогсохгүй унасан бөхөд шалтаг мундахгүй гэгчээр "Стадион цуурайтаж, сандарсандаа хазгай буруу ярьчихлаа" хэмээн өөрийгөө өмөөрүүлж амжсан.  Түүнийг нийслэлийн Засаг даргын орлогч З.Төмөртөмөө “Зүүн Азийн залуучуудын наадмыг нээж би үг хэлсэн, их сандарсан. Б.Баттүшиг ч мөн адил сандарсан гэсэн. Гадны зочид "За яахав дээ" гээд инээгээд л өнгөрнө лээ” хэмээн гэмийг нь цайруулж харагдана лээ.

   Гэвч бүхэл бүтэн Монгол Улсын Олимпын хороог төлөөлж буй Ерөнхийлөгчийн хувьд ямар ч бэлтгэлгүй байгаа нь ил байна. 

УИХ-ЫН ГИШҮҮН Г.ДАМДИННЯМ: Манай 80-аад оныхны амьдрал тогтож, дурсамждаа мөнгө зарцуулах боломжтой болж эхэлж байгаа нас л даа...

    Өнгөрсөн бямба гарагт “Татар” хамтлаг 20 жилийн ойн тоглолтоо  хийж, Төв цэнгэлдэх хүрээлэнг дүүргэсэн. Тоглолтод бараг л бүх насныхан очиж, нэг оройг хип хоп дуу сонсож, хайртай хамтлагийнхаа ойг тэмдэглэж өнгөрөөлөө.  Гэтэл УИХ-ын гишүүн Г.Дамдинням түүнийг нь тохуурхаж, доромжилсон өнгө аястай пост өөрийн цахим сүлжээндээ нийтлэв.

  Тэрбээр “ "Татар” хамтлагийнхан Төв цэнгэлдэх хүрээлэнг дүүргэж байгаад “тас” авчээ. Яалтчгүй манай 80-аад оныхны амьдрал тогтож, дурсамждаа мөнгө зарцуулах боломжтой болж эхэлж байгаа нас л даа...” гэсэн юм. Түүний энэ үг олон нийтийг бухимдуулж, төд удалгүй Г.Дамдинням тухайн постоо устгасан.  

   Түүний иргэдээ өмөөрөөд байна уу,  өөнтөглөөд байна уу гэдэг нь “хазгай” үг хэллэг үүгээр ч дуусахгүй. Өнгөрсөн хавар л гэхэд Байнгын хорооны хуралдааны үеэр “Боломжтой нь дэлхийн хэмжээнд, боловсролгүй нь нөгөө хэлдэг “ул”-ндаа үлдэж байна” гэж хэлж байсан ч удаатай. Г.Дамдинням гишүүний энэ мэт үг хэллэг хэдэн өдөр сошиал сүлжээнд олны дургүйцлийг хүргэж байгаад л мартагддаг. Тэгээд төд удалгүй ахин нэг  дуулиан гардаг боллоо. Төрийн түшээ хүний хувьд хэлэх үг, хийх үйлдлээ боддог, хянадаг баймаар байна.