Засгийн газрын хуралдаанаар хэлэлцсэн асуудлын талаар Хууль зүй, дотоод хэргийн сайд Х.Нямбаатар мэдээлэл хийлээ. Тэрбээр "Энэ зун нийслэлд үер буусантай холбоотой цаашид нийслэл, Улаанбаатар хотыг гамшигийн эрсдлээс урьдчилан сэргийлэх гамшигийн хор уршгийг арилгах, нийслэлийн хот төлөвлөлт, газар зохион байгуулалттай холбоотой зарим арга хэмжээний тухай Засгийн газрын тогтоолыг батлалаа. Улаанбатар хотын үерийн гамшигаас урьдчилан сэргийлэх инженерийн барилга байгууламжийн төлөвлөлтийг дахин авч үзэхээр боллоо.

Газрын тухай хуулиар аймаг, нийслэл, сум дүүргийн Засаг даргаас гадна БОАЖ-ын яам газар олгож байгаа. Мөн БХБ-ын яам газар олголт зохион байгуулж байгаа. Маш олон газар газар олгож байгаа нь зохион байгуулалтын төлөв алдагдсан. Тиймээс Газрын тухай хуулийн төслийг багцаар нь БХБ-ын сайд Ц.Даваасүрэн болон миний бие өргөн барина. Мөн өмнө нь газар олголтоор замбараагүй олгосон газрыг цуцлах асуудлыг тусгана. Газрын харилцааг зохицуулах Геодиз зураг зүйн газрыг Монгол Улсын Ерөнхий сайдын эрхлэх асуудлын хүрээнд аваачихаар холбогдох хууль тогтоомжид өөрчлөлт оруулах үүрэг өгсөн. Хууль эрх зүйн хүрээнд нийслэлийн Засаг даргад шинээр газар олгох захирамж гаргахгүй байх үүрэг өгсөн. Мөн хамгаалалтын бүсэд газар олгосон асуудалд холбогдох байгууллагууд шалгалтын ажил зохион байгуулна. Мөн саяын хэд хэдэн удаагийн үерийн гамшигийг судлах шинжээчийн дүгнэлт гаргахын ОБЕГ-т үүрэг болгосон. Үүний дагуу үерийн даланг сэтэлж барилга барьсан ААН-үүдээс хохирол нэхэмжилнэ. Тухайлбал "Авилга" хороолол голын ай савын хамгаалалтын бүсийг өөрчилсөн талаар танилцуулга хийлээ. Дунд голын усны урсацыг боомилж, хязгаарласнаас болж, үерийн ус хальсан эсэхийг ОБЕГ-ын шинжээчид судлаж, дүгнэлт гаргана. Ингээд Засгийн газар төрийг төлөөлж эдгээр аж ахуйн нэгжээс иргэний журмаар нэхэмжлэл гаргана" гэлээ.