Монгол Улсын Ерөнхий сайд Л.Оюун-Эрдэнэ АНУ-ын дэд ерөнхийлөгч Камала Харрисын урилгаар тус улсад албан айлчлал хийж байгаа. Уг айлчлалаараа Л.Оюун-Эрдэнэ АНУ-д айлчилж байгаа Монгол Улсын 12 дахь төрийн өндөрлөг болж байгаа юм. Тэгвэл Ерөнхий сайд Л.Оюун-Эрдэнээс өмнөх төрийн өндөрлөгүүдийн АНУ-д хийсэн айлчлал, айлчлалын үр дүнгийн талаарх мэдээллийг тоймлон хүргэж байна.

ЗАСГИЙН ГАЗРААС АНУ-Д ХИЙСЭН АЙЛЧЛАЛУУД

1990  ОНД  МОНГОЛ УЛСЫН АНХНЫ ЕРӨНХИЙ САЙД Д. БЯМБАСҮРЭН АНУ-Д ХИЙХ АЙЛЧЛАЛЫГ ЭХЛҮҮЛСЭН

        Манай улс АНУ-тай анх 1987 онд дипломат харилцаа тогтоосон. 1988 онд  Улаанбаатар хотноо АНУ-ын Элчин сайдын яам албан ёсоор нээгдсэн бол 1989 онд Вашингтон хотноо Монгол Улсын Элчин сайдын яам албан ёсоор нээгдсэн. Айлчлалын тухайд  1990  онд  Монгол Улсын анхны Ерөнхий сайд Д. Бямбасүрэн АНУ-д айлчилж байлаа. Үүний дараа  1990 наймдугаар сард АНУ-ын Төрийн нарийн бичгийн дарга Жеймс Бейкер Монгол Улсад айлчилсан байдаг. Айлчлалаар шилжилтийн эдийн засгийн талаар мөн АНУ-ын хөгжлийн (USAID) тусламжийн талаар ярилцаж байжээ. Улмаар 1991 онд Монгол Улсыг ОУВС, Дэлхийн Банк, АХБ-нд гишүүнээр элсэхэд АНУ дэмжлэг үзүүлсэн.

2006 ОНД ЕРӨНХИЙ САЙД М.ЭНХСАЙХАН

       2006 онд Ерөнхий сайд М.Энхсайхан айлчилж, АНУ-ын Төрийн нарийн бичгийн даргын орлогч Строб Талботтой албан уулзалт хийж байжээ. Уулзалтаар хоёр орны эдийн засгийн болон улс төрийн харилцааны талаар ярилцсан байдаг.

2009 ОНД ЕРӨНХИЙ САЙД С.БАЯР

      2009 онд Ерөнхий сайд С.Баяр АНУ-д айлчилсан. Уулзалтаар хоёр талын парламентын харилцааг сайжруулах талаар хэлэлцэж байсан.

2013 ОНД УИХ-ЫН ДАРГА З.ЭНХБОЛД

     УИХ-ын дарга З.Энхболд 2013 оны гуравдугаар сард АНУ-д албан ёсны айлчлал хийж байв.  Айлчлалын үеэр АНУ-ын Төрийн нарийн бичгийн даргын нэгдүгээр орлогч У.Бёрнзтэй уулзаж, Брукингсийн стратеги судлалын хүрээлэнгээр зочлон, тус хүрээлэнгийн Зүүн хойд Азийн бодлого судлалын төвийн захирал Р.Буштэй уулзсан.

 2015 ОНД ЕРӨНХИЙ САЙД Ч.САЙХАНБИЛЭГ

      2015 онд Ерөнхий сайд Ч.Сайханбилэг айлчилж, Вашингтон хотноо АНУ-ын Дэд ерөнхийлөгч Жо Байдэн, Худалдааны сайд Пэнни Притцкэр, мөн Сенатч Жон МакКэйн нартай уулзаж, АНУ-ын Худалдааны Тэнхим болон Монгол улс дахь Америкийн Худалдааны Тэнхимийн барих оройн зоогт хүндэт зочноор уригдан оролцсон. Тэрбээр Нью-Йорк хотын Хөрөнгийн биржээр зочилж үйл ажиллагаатай танилцсан. Бас Дэлхийн банкны Гүйцэтгэх захирал Др.Жим Ён Кимтэй уулзаж байв.

2018 ОНД ЕРӨНХИЙ САЙД У.ХҮРЭЛСҮХ

        2018 онд Ерөнхий сайд У.Хүрэлсүхийн айлчлалаар Монгол, АНУ-ын Өртгөсөн Иж бүрэн түншлэлийн харилцаанд шилжсэн. Үүнтэй холбогдуулаад АНУ-ын Төрийн нарийн бичгийн дарга М.Помпео болон Монгол Улсын Ерөнхий сайдын Хамтарсан мэдэгдэл гаргасан. Мөн МСС-тай хоёр дахь компакт гэрээнд гарын үсэг зурлаа. Үүгээр АНУ-ын талаас 350 сая ам.доллар буюу өнөөгийн ханшаар 875 тэрбум төгрөгийн буцалтгүй тусламжийг өгөхөөр болсон.

ЕРӨНХИЙЛӨГЧ НАРЫН АНУ-Д ХИЙСЭН АЙЛЧЛАЛ

    1991 онд П.Очирбат Ерөнхийлөгч анх удаа АНУ-д айлчилж, Цагаан ордонд зочилж, АНУ-ын Ерөнхийлөгчтэй хэлэлцээ хийсэн. Дараа нь НҮБ-ын Ерөнхий ассамблейн чуулганд оролцсон. Ингэж анх удаа Монгол Улсын төрийн тэргүүн АНУ-д айлчилсан түүхтэй.

    Монгол Улсын хоёрдахь Ерөнхийлөгч Н.Багабанди гурван удаа АНУ-д очсон. 2000 онд НҮБ-ын мянганы дээд хэмжээний чуулга уулзалтад оролцсон. 2003 онд НҮБ-ын бичигтэн болсон ойн чуулганд, 2004 онд биеэ дааж айлчилсан юм.

    Монгол Улсын гуравдахь Ерөнхийлөгч Н.Энхбаярын үед мөн л гурван удаа АНУ-д айлчилж байсан.   Тодруулбал, 2005 онд НҮБ-ын Ерөнхий ассамблейн 60 дугаар чуулганд  оролцсон. 2007 онд айлчилсан. 2008 онд НҮБ-ын Ерөнхий ассамблейн өндөр түвшний чуулганд оролцсон.

   Монгол Улсын дөрөвдэх Ерөнхийлөгч Ц.Элбэгдорж найман жилийн хугацаанд АНУ-д долоон удаа очсон байдаг. 2009 онд НҮБ-ын Ерөнхий ассамблейн 64 дүгээр чуулган, 2011 онд АНУ-д айлчлаад, НҮБ-ын 66 дугаар чуулганд оролцсон. 2012 онд НҮБ-ын Ерөнхий ассамблейн 67 дугаар чуулганд, 2013 онд 68 дугаар чуулганд, 2014 онд 69 дүгээр, 2015 онд 70 дугаар, 2016 онд 71 дүгээр чуулганд оролцсон.

      Түүний дараа Монгол Улсын тав дахь Ерөнхийлөгч Х.Баттулга 2019 онд айлчилсан байдаг. 2019 оны долдугаар сард АНУ-д хийсэн айлчлал болон хоёр улсын Төрийн тэргүүн нарын албан ёсны хэлэлцээрийн үр дүнд хоёр улсын харилцаа Стратегийн түншлэлийн түвшинд хүрснийг зарлаж, хамтарсан тунхаглал гаргасан билээ.

    Хамтарсан тунхаглалыг бататган АНУ-ын Конгрессын Сенатын танхим “Америкийн Нэгдсэн Улс, Монгол Улсын Стратегийн түншлэлийг бататгах, Монгол Улс дахь ардчилсан тогтолцооны 30 жилийн ойг тэмдэглэх тухай” тогтоолын 2021 оны дөрөвдүгээр сарын 15-ны өдөр баталж байсан удаатай.