Боловсролын багц хуульд орсон англи хэлийг гуравдугаар ангиас нь заах, Монгол Улсын үндсэн гадаад хэл болгох тухай заалт байнгын хорооны гишүүдийн санал хураалтаар дэмжигдээгүй.

                Энэ талаар УИХ-ын гишүүн Ч.Ундрам байр сууриа илэрхийллээ. Тэрбээр “Энэ заалт байнгын хорооны эхний хурлаар дэмжигдсэн боловч өнөөдөр зарим гишүүд үндэсний аюулгүй байдалтай холбоотой учир хөтөлбөрөөрөө шийдэх санал гаргаад, олонх нь дэмжлээ. Боловсролын сайд солигдох бүрд судлах хэл нь солигдоно. Ийм асуудал үүсгэхгүйн тулд Англи хэлийг  Монгол Улсын үндсэн гадаад хэл болгох шаардлагатай. Хувийн сургуулийн улсын сургуулиас ялгарах давуу тал  нь англи хэл учраас бизнесээ бодоод үүнийг эсэргүүцсэн байх. Хүүхэд болгон англи хэл эзэмшээд, дэлхийн топ сургуульд тэнцээд БЗС-аас зээл аваад явах боломжийг бид олгох ёстой.  Бид эх хэлээ үгүйсгэхгүй. Харин дэлхийн иргэнийг багаас нь бэлдэх хэрэгтэй” гэлээ.