УИХ-ын Сонгуулийн тухай хуулийг өчигдөр Төрийн байгуулалтын байнгын хорооны хуралдаанаар хэлэлцүүлсэн билээ. Сонгуулийн тухай хуульд  эмэгтэйчүүдийн квотыг нэмж, 50:50 гэсэн зарчмаар явуулах байр суурийг баримтална хэмээн улс төрийн намууд мэдэгдэж байв.

Тэгвэл уг асуудлыг өчигдөр Төрийн байгуулалтын байнгын хорооны хуралдаан дээр хэлэлцэж, санал хураасан байна. Улмаар эмэгтэй гишүүдийн квотыг 50 хувьд хүргэх талаар зарчмын зөрүүтэй санал хураахад хуралдаанд оролцсон нийт 13 гишүүний долоо нь дэмжээгүй байна. Тодрбуулбал, Төрийн байгуулалтын байнгын хорооны дарга Н.Энхболд, МАН-ын бүлгийн дарга Д.Тогтохсүрэн, С.Амарсайхан, Ж.Батсуурь, Ц.Мөнх-Оргил, Б.Пүрэвдорж, Ж.Эрдэнэбат нар тэгш оролцоонд 30 хувь хангалттай гэж үзжээ.

Улс төрийн намууд үүрэг авч, жендерийн тэгш оролцоог нэмэгдүүлэх зорилгоор 50:50 хувийг хангах тухай дарга нар амлалт өгөөд буй. Харамсалтай нь, УИХ-ын гишүүд тэр дундаа эрэгтэй гишүүд эмэгтэйчүүдийн тоог нэмэх асуудалд хориг хандаж байгаа нь эндээс тодорхой харагдаж байна.