Хүүхдийн баярыг хүүхдэд нь үлдээж суръя, эрхэм гишүүдээ. Эрхийг нь хамгаалах ганцхан өдөр бэлэг өгөх нэрээр УИХ-ын гишүүн М.Оюунчимэг, Ж.Сүхбаатар нар баахан хүүхдүүд цуглуулж байгаад дунд нь ороод ташаа хаялан бүжиглэж байгаа бичлэг цахим орчинд цацагдлаа.

    Өнгөрсөн хугацаанд хүүхдийн эрхийн зөрчилтэй холбоотой сэтгэл сэртхийлгэм мөн ч олон дуулиантай хэргүүд нийгэмд гарсан даа. Энэ бүх хэрэг дээр УИХ-ын гишүүд тэр дундаа УИХ-ын эмэгтэй гишүүд ганц үг ган хийлгүй нүдэн балай чихэн дүлий явсаар өнөөдрийг хүрсэн. Гэтэл сонгууль ойртсон сургаар тойргийнхоо зүг гүйлдэх болсон гишүүд хүүхдийн эрхийг хамгаалах өдрийг ч алгасалгүй гүйж очоод дунд нь бүжиглэж яваа харагдах.

    Мянга мянган хүүхдийн эрх зөрчигдөж, чимээгүй хаалганы цаана уйлж байхад УИХ-ын эрхэм гишүүд хүүхдийн эрхийг хамгаалах нэг ч хуулийн төсөл барьж гүйгээгүй хүүхдийн баяр дээр бүжиглэж байгаа нь дэндүү харамсалтай. Наймхан настай охин харгис дээрэнгүй нэгний балмад үйлдлийг тэвчилгүй хорвоог орхисон, гуравхан настай хүү балмад хэрцгий хойд эцэгтээ зодуулаад амь гуйн тэмцэхэд, хаалттай хаалганы цаана мянга мянган бяцхан зүрх шаналахаас урьтаж хуруугаа ч хөдөлгөөгүй хэр нь хүүхдийн баяр дээр оччихсон баяр хөөр болж байгаа чинь зүйд нийцэхгүй байна УИХ-ын эрхэм гишүүн ээ. Хүүхдийн баяр дээр сонгуулийн сурталчилгаагаа хийхээс наагуур яваа энэ үйлдэл М.Оюунчимэг гишүүнийг хүний эрхийн мэдрэмжгүй гэдгийг дахин батлан харууллаа.

      М.Оюунчимэг гишүүн мөн ч олон удаа хүний эрхийн мэдрэмжгүй байгаа харуулсан даа. Тухайлбал, Үндсэн хуулийн өөрчлөлтийг иргэдэд танилцуулах үеэрээ тойрогтоо шороо зөөж гүйгээд, сөхөрч суугаад мод тарьсан зургаа цахим хаягтаа нийтэлсэн нь бас нэгэн олны хошигнох сэдэв болоод амжив.Түүний олны анхааралд өртсөн инээдэмтэй үйлдэл долоон жилийн өмнө Байнгын хорооны хуралдааны үеэр үдийн цайндаа боов идэж, инээмсэглэн суугаа бичлэг нь цахим сүлжээнд нийтлэгдэж “Боов” хэмээн хочтой болсноор эхэлсэн. Мөн өнгөрсөн өвөл “Хотын утаа ихэссэн нь илт мэдэгдэж байна, Зайсанд хүртэл утаа үнэртэж байна” гэж хэлсэн байдаг. Учраа олохгүй мунгинаж, олны хэл амын бай болж, сонгууль дөхөх цагаар сонгогчдодоо бялдуучилж яваа эрхэм  гишүүн маань хэзээ улс төрч болон төлөвшиж, төр түшилцэнэ дээ. Олигтой хууль санаачилж чадахгүй бол ядаж иргэдийнхээ өмнө "элийрхээ" зогсоогоосой билээ.

         Түүний талаар энэ үйлдлээс гадна  албан тушаал, эрх мэдлээ урвуулан ашигласан хэд хэдэн баримтууд бий. Тэрбээр төрийн түшээ болоод түмэн олондоо инээд бэлэглэж, төрөл садандаа харин ч нэг хайр элбэрлийг үзүүлсэн байдаг. Төрсөн хүү Б.Энхмөрөнийгөө Боловсролын зээлийн сангийн зээлээр сургаж, Эрүүл мэндийн даатгалын ерөнхий газрын Худалдан авалт гэрээлэлтийн газрын даргаар томилж байлаа. Угтаа энэ албан тушаалд төрийн албанд долоогоос дээш жил ажилласан хүн хаших ёстой. Харин түүний хүү төрийн албан хаагчийн шалгалтдаа ч тэнцээгүй нэгэн юм. Хүүгээ эрхлүүлээд зогсохгүй төрсөн ах, эгч болон тэдний хүүхдүүдийг  төрийн албанд төвхнүүлээд амжсан юм.

   Уйваагүй, маанаг үйлдэл нь хэрээс хэтэрсэн түүний ээлжит сонгуулийн шоу юу байх, бол...