Үндсэн хуульд нэмэлт өөрчлөлт оруулах хуулийн төслийн эцсийн хэлэлцүүлгийг УИХ-ын чуулганы хуралдаанаар хэлэлцүүлж байна.

         УИХ-ын гишүүн М.Оюунчимэг “Би сонгогчидтойгоо хоёр удаа уулзлаа. Манай Чингэлтэй дүүргийн иргэд гишүүдийн тоог нэмэх нь буруу гэсэн байр суурийг ихэнх нь хэлэхээс гадна тоондоо биш, чанар, сонгосон хүндээ асуудал байгааг онцлон ярьж байна. Тиймээс Улс төрийн намын тухай хуульд хариуцлагатай хандах ёстой. Иргэд “Өнөөдөр Үндсэн хуулийн өөрчлөлт гэхээс илүү бидний амьдралд тулгарч байгаа асуудалд өөрчлөлт хийх хэрэгтэй байна. Үндсэн хууль өөрчлөгдлөө гээд бидний амьдрал өөрчлөгдөх юм уу” гэж асууж байна. Парламентын төлөөлөх чадварыг сайжруулах нь нэг талаасаа зөв, нөгөө талаасаа ард түмнээ төлөөлөх үүргээ ухамсарлаж чаддаг хүмүүс нь парламентад байсан цагт Засгийн газраа хүчтэй ажиллуулж чадна. Тиймээс ард түмнээ төлөөлж хариуцлагатай сайн ажиллах хэрэгтэй байна. Мөн парламентын гишүүдийн тоог нэмснээрээ ард түмэнд тулгарч байгаа асуудал сайжрах уу гэдгийг бодолцох ёстой байна. Түүнээс парламентын төлөөлөх чадварын тоог нэмэгдүүлдэг, ард түмний амьдрал ахуй, тулгамдаж байгаа асуудалд нэг ч өөрчлөлт гарахгүй бол бид тогтолцоогоо мянга өөрчлөөд ямар ч нэмэргүй гэдгийг онцлон хэлмээр байна" гэв.