Засгийн газрын хэрэг эрхлэх газрын дарга Д.Амарбаясгалан Үндсэн хуулийн нэмэлт өөрчлөлтийн асуудлаар мэдээлэл өглөө.

    Тэрбээр “Үндсэн хуулийн өөрчлөлтийн гуравдугаар хэлэлцүүлгийн өмнө намын бүлгүүд өнөөдөр хуралдаанаа хийж байна. Парламентын гишүүдийн тоог нэмэх асуудал ард иргэдэд шууд утгаараа таалагдахгүй байх асуудал гарч байна. Үүнийг ойлгож, өөрчлөлт хийх хэрэгтэй гэж үзэж байгаа хэсэг ч бий. Өнөөдрийн нөхцөл байдлыг бид эм уух байдлаар аргацаагаад явах уу, мэс засал хийгээд анагаах уу гэдэг сонголтын өмнө ирээд байна. 1992 оны Үндсэн хуулийн өөрчлөлт социалист нийгмээс олон намын тогтолцоонд шилжсэн, ардчилсан, эрх чөлөөт эдийн засгийн нийгмийг бүтээж байсан нийгмийн шилжилт болсон. Энэ 30 жилийн хугацаанд гарсан алдаа дутагдал болгоныг цаашид бид хараад суух уу, өөрчлөх үү гэж Засгийн газраас хуулийн төсөл өргөн барьсан. УИХ-ын гишүүд ч үүнийг бодолцоно гэж харж байна.

   УИХ-ын гишүүдийн хараат бусаар саналаа өгөхөд бид нөлөөлж болохгүй. Гэхдээ  Засгийн газрын гишүүд нэг кабинет, нэг бодлогоор ажиллаж байна. Нэг кабинетын гишүүд ардчилсан зарчмаар ажиллах ёстой. Олонхын шийдвэрийг цөөнх дагаж, цөөнхийн шийдвэрийг олонх харгалзан үзэх учиртай. Эцсийн үр дүн гараагүй байна. Маргааш Үндсэн хуулийн нэмэлт, өөрчлөлтийг төслийн гуравдугаар хэлэлцүүлгийг хийнэ. Гишүүдийн тоог нэмэх асуудлыг өнөөдрийн байдлаас харж болохгүй. Энд хэн нэгэн улстөрч, аль нэг намын өөрчлөлт гэж байж болохгүй” гэлээ.