Нийслэлийн Засаг дарга бөгөөд Улаанбаатар хотын захирагч  Д.Сумъяабазар Хан мөрний бүтээн байгуулалттай танилцлаа.

         Тэрбээр “Улаанбаатар хотод хийж хэрэгжүүлэхээр үзэж байгаа хэд хэдэн төсөл байгаа. Улаанбаатар смарт карт буюу нийтийн тээврийн системийг сайжруулах, хөгжүүлэх шаардлагатай. Дэлхийн арав гаруй улсын технологийн шийдэл хийж байгаа гол компаниудтай маргааш уулзана. Улаанбаатар хотод бид шинээр такси үйлчилгээ үзүүлэх саналыг Сөүлийн хотын даргад санал тавьсан. Хотод албан ёсны такси үйлчилгээнүүд стандартын шаардлагад нийцэхгүй байна. Нийтийн тээвэрт өргөн утгаараа такси ч орно, метро ч орно. Тэгэхээр эдгээрийг хамтарсан байдлаар шийднэ. Солонгос Улсын систем бол дэлхийд нэвтэрсэн, шалгарсан систем гэж эхний төслийг харж байгаа. Хоёрдугаарт, Улаанбаатар хотод Туул голыг түшиглэсэн эдийн засгийн бүс байгаа гэж бодож байгаа. Энэ дагуу өнөөдөр Хан мөрний бүтээн байгуулалтын ажилтай танилцаад явж байна. Энэ бүтээн байгуулалт шиг голоо дагасан бүтээн байгуулалт хийх боломж бидэнд бий. Хамгийн гол нь санхүүгийн асуудал байгаа учир яах аргагүй засаг төрийн хэмжээнд тусган ярилцана. Тэгэхээр Туул голын бүтээн байгуулалтыг санхүүгийн эх үүсвэрийг бүрэн шийдэж байж эхлүүлнэ гэсэн бодол байна. Улаанбаатар хотын бүтээн байгуулалтын төсөв тав хүрэхгүй тэрбум төгрөгийн эх үүсвэр байгаа. Тэгэхээр бид санхүүгийн эх үүсвэрээ олох асуудал бий. Мэдээж шийдэж, шийдвэрлэнэ. Дараагийн нэг асуудал нүүрс хүчлийн хийг багасгах, агаарын бохирдлыг бууруулах төслийг хэрэгжүүлэх боломжтой юм байна. Энд ч мөн их хэмжээний санхүүжилтын эх үүсвэр зайлшгүй шаардлагатай. Сөүл хотын даргад хотын таксийг хувийн хэвшлийн оролцоотойгоор хангаж өгөх, зөвшөөрлийг нь 5-10 жилийн хугацаагаар олгох, бизнес хийх орон зайг нь гаргаж өгөх, хотын иргэдийг аюулгүй байх хүсэлтийг тавьсан. 2000 таксийг эхний ээлжид үйлдвэрлэлийнх нь үнээр нь шийдээд өгөх асуудлыг тавьсан” гэв.