Хөгжлийн банкны гүйцэтгэх захирал асан Н.Мандуул өнгөрсөн даваа гарагт ажлаа хүлээлгэж өгсөн талаар мэдээлсэн. Н.Мандуул тус албан тушаалд хоёр жилийн хугацаанд ажилласан бөгөөд өөрийн хүсэлтээр ажлаасаа чөлөөлөгдсөн. Тэгвэл өнөөдрийн Засгийн газрын хуралдаанаар Н.Мандуулыг ШӨХТГ-ын даргын үүрэг гүйцэтгэгчээр томилох шийдвэр гарчээ.

                  Энэ талаар Сангийн сайд Б.Жавхлан Засгийн газрын хуралдаанаас гарсан шийдвэрийн талаар мэдээлэхдээ “Удаа дараа өөрийн хүсэлтээр ажлаас чөлөөлөгдөх хүсэлтээ өгөөд байсан Хөгжлийн банкны гүйцэтгэх захирал байсан Н.Мандуулыг хүсэлтийг хүлээн зөвшөөрсөн. Харин өнөөдрийн Засгийн газрын хуралдаанаар Н.Мандуулыг ШӨХТГ-ын даргын үүрэг гүйцэтгэгчээр томилох шийдвэр гарлаа. Засгийн газраас Н.Мандуулд амжилт хүсэж, ажилд нь томилсон” гэсэн юм.

ШӨХТГ-ын даргын үүрэг гүйцэтгэгчээр томилогдсон Н.Мандуул нь 2007 онд Сангийн Сангийн яамны Төсвийн бодлогын газрын мэргэжилтнээс ажлын гараагаа эхлүүлж, Төсвийн бодлогын газар, Санхүүгийн бодлогын газарт хэлтэс, газрын дарга хүртэл нийт 10 гаруй жил Сангийн яаманд ажиллажээ. Тэрбээр Сангийн яаманд ажиллах хугацаандаа  Засгийн газрын Мазаалай, Хуралдай, Дим сам, Гэрэгэ, Century зэрэг бондыг олон улсын зах зээлд арилжаалах ажлыг удирдсан байдаг.  Улмаар 2021 оны наймдугаар сард Хөгжлийн банкны гүйцэтгэх захирлаар томилогдоод байсан юм.

Н.МАНДУУЛЫН ТУХАЙ:

Боловсролын байдал:

• 1990-2000 онд ерөнхий боловсролын Нэгдүгээр сургуульд бүрэн дунд боловсрол
• 2003-2007 онд Болгар дахь Америкийн их сургуулийг Бизнесийн удирдлагын бакалавр /Соросын сангийн тэтгэлэг/
• 2012-2014  онд  АНУ-ын Брэндайзын их сургуулийг Бизнесийн удирдлагын магистр /АНУ-ийн Засгийн газрын Фүлбрайтын тэтгэлэг/

Мэргэшил дээшлүүлсэн байдал:

• Санхүүгийн тогтвортой байдал, системийн эрсдэл, макро бодлого, Засгийн газрын санхүүгийн статистик, Төслийн санхүүжилтийн загварчлал зэрэг чиглэлээр Дэлхийн банк, Олон улсын валютын сангийн сургалтуудад хамрагдаж мэргэжил дээшлүүлсэн.

Гадаад хэл:

• Англи,
• Орос хэлтэй.

Ажилласан байдал:

• 2007-2008  онд  Дэлхийн банкны Засаглалыг дэмжих төслийн дотоодын зөвлөх
• 2008-2012   онд Сангийн яамны Төсвийн бодлогын газарт мэргэжилтэн, хэлтсийн дарга
• 2013-2014   онд IHS, Consulting group, АНУ, Санхүүгийн шинжээч
• 2014-2018  онд  Сангийн яамны Санхүүгийн бодлогын газарт хэлтсийн дарга
• 2019-2020  онд  “Эрдэнэс Тавантолгой Майнинг” ХХК-ийн Тэргүүн дэд захирал,
• 2020-2021  онд  “Эрдэнэс Монгол” ХХК-ийн Дэд бүтэц хариуцсан захирал,
• 2021-2021 онд Сангийн яамны Санхүүгийн бодлогын газрын дарга
• 2021-2023  онд Хөгжлийн банкны гүйцэтгэх захирлаар тус тус ажилласан.