С.Зориг агсны амийг хөнөөсөн хэрэгт буруутгагдан гурван шатны шүүхээс ял авсан Т.Чимгээ, Б.Содномдаржаа нарын хэргийг хэрэгсэхгүй болсон талаар өнөөдөр прокурорын байгууллагаас мэдээлэл хийлээ. Тодруулбал, Т.Чимгээ, Б.Содномдаржаа нарыг С.Зоригийн амийг хөнөөсөн нь бүрэн тогтоогдоогүй хэмээн үзэж, уг хэргийг хэрэгсэхгүй болгосон байна. Ингэснээр 1998 онд гарсан улс төрийн онц ноцтой хэргийг илэрсэн, илрээгүй гэх олон жилийн дуулиан дахиад сэдэрлээ.  С.Зориг агсныг хөнөөсөн гэх хэргийн эзэд өнөөдрөөс цагаадаж, дараагийн хэрэгтнүүдийг хайх эрэл эхэлж байна гэсэн үг. Сонгууль дөхөөд эхлэхтэй зэрэгцээд үе үеийн эрх баригч нарын сөхдөг төр нийгмийн нэрт зүтгэлтэн С.Зориг асны хэргийг хуулийн дахин дэгдэх нь.

       2017 онд Дээд шатны шүүхийн шийдвэр албан ёсоор гарснаас хойш тэднийг С.Зориг агсны амийг хөнөөсөн хэмээн үзэж байв. Гэтэл гурван шатны шүүхийн шийдвэрийг зургаан жилийн дараа үгүйсгэж, хэргийг нь хэрэгсэхгүй болгосон нь нийгэмд том дуулиан тарилаа.

      Ухаандаа тухайн үед ажиллаж байсан шүүгч нар үнэн, зөв, хуулийн дагуу ажиллаж чадаж байсан уу, гэх эргэлзээ ч олны дунд үүсэх нь. Гурван шатны шүүхийн шийдвэрийг зургаан жилийн дараа үгүйсгэж байгаа нь ардчилсан улсад өнгөрсөн хугацаанд улс төрийн том хэлмэгдүүлэлтүүд өрнөсөөр байсан гэдэг агуулга харагдаж байна. Үндсэндээ бол тухайн үед Т.Чимгээ, Б.Содномдаржаа нарыг хэлмэгдүүлэн шүүхийн шийдвэр гаргасан бол тухайн үед шүүхээс ял сонссон хүмүүс ч хэлмэгдүүлэлтэд өртсөн юм биш үү, гэх эргэлзээ үүсэж байгаа юм.

     Тэгвэл С.Зориг агсны хэрэгт холбогдуулан Т.Чимгээ, Б.Содномдаржаа нарт ял оногдуулсан Улсын дээд шүүгч нарыг танилцуулж байна. 2017 оны наймдугаар сарын 4-нд болсон Улсын дээд шүүхийн хуралдааныг Ерөнхий шүүгч Ц.Зоригоор ахлуулсан шүүгчдийн бүрэлдэхүүн шүүсэн байдаг. Улсын дээд шүүхийн шийдвэрээр Т.Чимгээд 20 жилийн, Б.Содномдаржаад 24 жилийн хорих ял ногдуулсан байдаг. 

ЕРӨНХИЙ ШҮҮГЧ АСАН Ц.ЗОРИГ

    Ц.Зориг нь 1982-1990 онд Сэлэнгэ аймаг, Улсын Дээд шүүх, Хууль зүй, арбитрын яаманд арбитрчаар ажиллаж байв. Улмаар 1990-1992 онд Октябрийн районы ардын шүүхэд шүүгч, 1992-1993 онд Улаанбаатар хотын шүүхийн гишүүн, 1993-2006 онд Нийслэлийн шүүхийн шүүгч, 2006-2010 онд Нийслэлийн шүүхийн Ерөнхий шүүгч, 2010 онд Улсын Дээд шүүхийн шүүгч, 2010-2013 онд Шүүхийн Ерөнхий Зөвлөлийн даргаар тус тус ажилласан. Мөн 2010 оны арваннэгдүгээр сарын 5-нд  Улсын Дээд шүүхийн Ерөнхий шүүгчээр ажиллаж, 2019 онд өөрийн хүсэлтээр албан тушаалаас нь чөлөөлсөн байдаг.

УЛСЫН ДЭЭД ШҮҮХИЙН ШҮҮГЧ Д.ЭРДЭНЭБАЛСҮРЭН

Д.Эрдэнэбалсүрэн нь эрх зүйч, хуульч мэргэжилтэй. Эрхүү хотод магистрын  зэрэг хамгаалсан. 1991-2004 онд Ховд аймагт прокуророор ажиллаж байжээ. 2009 онд Монголын мянганы сорилтын санд ажиллаж  эхэлсэн гэдэг.  

  Улмаар 2012 онд Улсын дээд шүүхийн шүүгчид нэр дэмжин ажиллаж эхэлсэн байдаг. 

УЛСЫН ДЭЭД ШҮҮХИЙН ШҮҮГЧ Ч.ХОСБАЯР

       Шүүгч Ч.Хосбаярын хувьд өмнө нь прокуророор ажиллаж байгаад шүүгч болжээ. Тэрбээр Монгол Улсын Ерөнхийлөгчийн 2015 оны дөрөвдүгээр сарын 22-ны өдрийн 58 дугаар зарлигаар Улсын Дээд шүүхийн шүүгчээр томилогдож байсан.

    2018 оны ХОМ мэдүүлгээр монголын 500 гаруй шүүгч нарыг манлайлж байв. Улмаар үндэслэлгүй хөрөнгөжсөн гэх хэрэгт нэр холбогдоод амжсан.

УЛСЫН ДЭЭД ШҮҮХИЙН ШҮҮГЧ Б.ЦОГТ

        Б. Цогт нь 1975 онд Улаанбаатар хотод төрсөн. Одоо 44 настай. Ам бүл 5, эхнэр хүүхдүүдийн хамт амьдардаг. Эрх зүйч, улс төр судлаач төрийн удирдлагын магистр зэрэгтэй. Б.Цогтын эхнэр Сэнгэравдангийн Жанхор Шүүхийн Ерөнхий зөвлөлийн Санхүүгийн тасгийн дарга, Шүүхийн санхүү, хангамжийн хэлтсийн дарга, Улсын Дээд шүүхийн нягтлан бодогчоор тус тус ажиллаж байсан.