6000-8000 АЛБАН ХААГЧИЙГ ХОМГОРГОЛОН ХАЛСНААР ТӨРИЙН АЛБНЫ ЧАДАВХ ДОРДОХ ВИЙ

         Л.Оюун-Эрдэнэ, Д.Амарбаясгалан нар хууль бусаар төрд шургалсан 6000-8000 төрийн албан хаагчийг “Ажлаас нь чөлөөлнө” гэснээр албан тушаалын хэнээтэй нөхдийн хорхойтой араанд зуугдлаа. Засгийн газрынхан 5Ш ажиллагааны хүрээнд сүүлийн 30 жилд хэрэгжүүлж чадаагүй ажлыг эхлүүлж, хууль бусаар төрд ажиллаж буй ажилчдыг хомгорголон халах болсонд иргэд баярлаж байна. Хууль бусаар эхнэр, хүүхдээ төрд зүтгүүлсэн эрх мэдэлтнүүдийг “Төрийн албыг төрлийн алба болгогсод” хэмээн дургүйцдэг шиг насаараа төрд ажилласан дарга нарыг “Монголын төр түүнд ямар өртэй юм. Хурдан чөлөөлөөч” хэмээн бухимддаг нь монголчуудын зан. Тухайлбал, өнгөрсөн лхагва гарагийн Засгийн газрын хуралдаанаар “Х.Бадамсүрэнг үүрэгт ажлаас нь чөлөөлсөн, Н.Багабанди өөрийн хүсэлтээр ажлаа  хүлээлгэн өгөх хүсэлтээ өгсөн” гэх мэдээлэлд хөгшин, залуугүй ямар их баярлаж байв аа. Бүр олон нийтийн сүлжээгээр “Тэдний хувьдаа завшдаг байсан мөнгө монголчуудад хүртээмжтэй болох нь. Монголын төр тэднээс саллаа” хэмээн хөөрцөглөж,  өнөөдрийг хүртэл бичсээр байна.

        Нөгөөтэйгүүр МАН-ынхан 5Ш ажиллагааны хүрээнд төрийн албыг цэвэрлэх нэрийдлээр сонгууль өгөх боловсон хүчнээ цэвэрхэн аргаар бэлдэж байгаа юм биш биз гэх хардлага бий. Сонгууль дөхсөн энэ үед аль салбарын ямар албаны хэчнээн хүн МАН-д, хэд нь АН-д санал өгөх вэ хэмээх судалгаа явуулж, үр дүнд нь аль салбарын албан хаагчдыг МАН-ынханд сонгууль өгүүлэхээр нэмэх вэ хэмээх нарийн бодлого, төлөвлөгөө гаргадаг. Дээрх 6000-8000 алба хаагчийн зарим нь сонгуулийн золиосонд орж хохирох вий хэмээн иргэд хардаж буй. Мөн сонгуулиас өмнө шувуу ажиллагааны хүрээнд хэдийг нь авчирч, хэнийг нь үлдээх вэ гэдэг дээр тохиролцож байгаа гэх.

      Шувуу ажиллагаагаар Т.Бадамжунайг албадан авчирч, цагдан хорьж байгаа. Харин дараагийн хүнээр нь Н.Удаанжаргал, Ч.Сайханбилэг нар дурдагдаж буй. Энэ талаар Хууль зүй, дотоод хэргийн сайд Х.Нямбаатар өчигдөр  мэдээлэл хийхдээ “Унгар Улсаас Ж.Төгсбаяр, БНСУ-аас П.Болормаа нар өөрийн хүсэлтээр ирж, эх орондоо шалгуулах хүсэлтээ өгсөн. Авлига, албан тушаалын гэмт хэрэгт сэжиглэгдэж мөрдөн шалгах ажиллагааны явцад оргон зайлсан хүмүүсийг гадаад улсаас авчирах ажиллагааг гадаадын 23 улстай эрх зүйн харилцан туслалцах гэрээний хүрээнд эрэн сурвалжилж, эх оронд нь дуудан ирүүлэх ажиллагааг зохион байгуулж байна” гэсэн юм. Ингээд Монгол Улсын Ерөнхий сайд Л.Оюун-Эрдэнийн санаачилсан 5Ш ажиллагааны шувуу, шүүр ажиллагаа үргэлжилж, авлиага, албан тушаалын хэрэгт холбогдсон хүмүүс хуулийн байгууллагад шалгагдаж, хууль бусаар төрд ажиллаж, цалинжиж буй хүмүүс ажлаасаа чөлөөлөгдөхөд хүрсэн байдалтай үргэлжилж байна. Харин шилэн, шүгэл, шилжүүлэн авах ажиллагааг хаанаас, хэнээс, хэрхэн эхлүүлэх вэ.