УЕП-оос гаргасан саналын дагуу УИХ-ын гишүүн Д.Бат-Эрдэнэ, Т.Аюурсайхан, Н.Наранбаатар нарын бүрэн эрхийг түдгэлзүүлэх эсэх асуудлыг УИХ-ын Халдашгүй байдлын дэд хороо, МАН-ын бүлэг, Төрийн байгуулалтын болон Хууль зүйн байнгын хороодын хуралдаан, УИХ-ын чуулганаар хэлэлцсэн билээ. Эцэст нь, УИХ-ын гишүүн Д.Бат-Эрдэнэ, Т.Аюурсайхан нарын бүрэн эрхийг түдгэлзүүлсэн.

Харин Н.Наранбаатар гишүүнийг УИХ-ын гишүүд “цээжээрээ хамгаалж” авч үлдсэн билээ. Учир нь,  чуулганы хуралдаанд оролцсон гишүүдийн 53 хувь нь татгалзсан товчлуур дээр дарж, Н.Наранбаатар гишүүн танхимдаа үлдсэн юм.

Тэгвэл УЕП-оос дахин санал гаргаж, Н.Наранбаатар гишүүний бүрэн эрхийг түдгэлзүүлэх хүсэлтийг УИХ-ын дарга хүргүүлэхээр бэлтгэж байгаа гэх мэдээлэл гарч эхэллээ. Учир нь, УИХ-ын гишүүн асан Д.Бат-Эрдэнэд холбогдох нүүрсний хэргийг шалагахад Н.Наранбаатар гишүүн саад учруулж байж болзошгүй байна.

Ямартай ч УЕП-оос ирэх долоо хоногт гурван ч гишүүний бүрэн эрхийг түдгэлзүүлэх санал оруулахаас нэг нь УИХ-ын гишүүн Н.Наранбаатар байх бололтой. Сонирхуулахад, Н.Наранбаатар гишүүнийг УИХ дахь аймгийн Засаг даргаар ажиллаж байсан гишүүний бүлэглэл авч үлдсэн гэх мэдээлэл бий. 

       Мөн  УИХ-ын гишүүн Н.Наранбаатарын төрсөн дүү Н.Очгэрэл нь “Эвт повер майнинг” ХХК-ийг “Хостамга групп” ХХК, “Энбо тайж транс” ХХК-тай хамтран эзэмшдэг. Тэгвэл “Хостамга групп” ХХК-ийн захирал Очирын Оюунбат нь Хонг Конгийн “Anda investment international” компанитай хамтран “Оюут болор эрдэнэс” ХХК-ийг эзэмшдэг. “Оюут болор эрдэнэс” ХХК нь Өмнөговь аймгийн Баян-Овоо нүүрс угаах үйлдвэр барьж буй. Эндээс харахад Н.Наранбаатар нүүрстэй ямар ч холбоогүй байх үндэслэлгүй бөгөөд, хууль хяналтын байгууллага ч түүнийг нь нотлож, АТГ-т шалгаж эхэлсэн билээ.