Монгол Улсын эдийн засагт их хэмжээний хохирол учруулсан байж болзошгүй, олон холбогдогчтой нүүрсний хулгайн хэргийн гол “толгойлогч” гэх хоёр гишүүний бүрэн эрхийг түдгэлзүүлж, яллагдагчаар татан шалгаж байна. Тодруулбал, УИХ-ын гишүүн Т.Аюурсайхан, Д.Бат-Эрдэнэ нарын бүрэн эрхийг түдгэлзүүлэх саналыг Улсын ерөнхий прокурор Их хурлын даргад өргөн мэдүүлснээр Халдашгүй байдлын дэд хорооны хурлаар хэлэлцүүлж, гишүүд бүрэн эрхийг нь түдгэлзүүлэн шалгах шаардлага үүссэн гэдэг дээр санал нэгдэж, танхимаас “хөөсөн”.

       Тэгвэл дараагийн бүрэн эрхээсээ түдгэлгэх гишүүнээр Ш.Раднаасэд тодроод байгаа бололтой. УИХ-ын гишүүн Ш.Раднаасэдийг нүүрсний хулгайн хэрэгт холбогдсон, хууль сахиулагчдын шаардлагыг биелүүлээгүй, албан тушаал, эрх мэдлийн байдлаа урвуулан ашиглаж, төрийн ажилд санаатайгаар саад хийсэн гэх үндэслэлээр бүрэн эрхийг түдгэлзүүлэх санал гаргаж байгаа талаар бор шувуу нисэж эхэллээ.

        Нүүрсний хулгайн хэрэгт холбогдсон гишүүдийн нэрсийг анх АТГ-аас зарлахад МАН-аас УИХ-ын гишүүн Ц.Анандбазар, Ш.Раднаасэд, Ц.Сэргэлэн, Н.Наранбаатар, Б.Баттөмөр нарын нэр ил болж байсан. Тэгвэл энэ дундаас Ш.Раднаасэдийн нэр суглагдаж, бүрэн эрхээсээ түдгэлзэх магадлалтай болжээ.