Баялгийн эздийг эзэд шиг нь, өмнийн говийг говь шиг, Өмнөговь аймгийг аймаг шиг, Цогтцэций сумыг суурин шиг байлгахын төлөөх шийдвэрт их, бага хэмжээгээр оролцсон “Тавантолгой” ХК-ийн зарим хувьцаа эзэмшигч өөрсдөдөө мөн ч олон дайсан бэлдчихэж дээ.

        Аймаг, орон нутгийн бүтээн байгуулалт, элдэв хөрөнгө оруулалт, ийм тийм худалдаа наймаа, үйлдвэр, техник хэрэгсэл гээд аль эрхэлж болох бүхнээр аймгийнхаа иргэдийг эрвийх дэрвийхээрээ бодлогоор дэмжиж, нөлөөллийн арга хэмжээнд хуруу, гараа даран тодорхой хэмжээнд оролцсон удирдлага, хувь эзэмшигчид өнөөдөр Монгол Улсад битгий хэл Өмнөговь аймгийнханд ч хэрэггүй болчихсон мэт дүр өрнөж байна.

Золтой л “Тавантолгой” ХК ашигтай ажилласан нь, баялгийн эзэн болсон аймгийн иргэдэд ногдол ашиг тараасан нь, залуучуудыг бодлогоор дэмжиж боловсрол эзэмшүүлсэн нь, урд хязгаарт бүтээн байгуулалт сүндэрлүүлсэн нь, иргэдийг ажлын байраар хангасан нь, орон нутгийн төсвийг дангаараа үүрч өнөөдөрт хүрсэн нь хувьцаа эзэмшигчдийн буруу гэж хэлэх нь холгүй байна.

“ТАВАНТОЛГОЙ” ХК 144 ТЭРБУМ ТӨГРӨГИЙН НОГДОЛ АШИГ ТАРААЖ, ӨМНӨГОВЬ АЙМАГТ БҮТЭЭН БАЙГУУЛАЛТЫН АЖИЛ ЭХЭЛЛЭЭ

         Орон нутгийн өмчит “Тавантолгой" ХК өнгөрсөн хоёрдугаар сарын 25-нд  хуралдаж, ногдол ашиг хуваарилах шийдвэр гаргасан байдаг. Тодруулбал, “Таван толгой” ХК-ийн БЭТ П.Сайнзориг “Тавантолгой" ХК буюу орон нутгийн жижиг "Тавантолгой"-н ТУЗ хуралдаж, ногдол ашиг хуваарилах шийдвэр гаргалаа. 2022 оны бизнес төлөвлөгөөнд тусгаснаар 61 орчим тэрбум төгрөгийг ногдол ашиг болгон тараана гэж төлөвлөж байсан бол урьдчилсан байдлаар компанийн татварын дараах ашигт байдлыг харгалзан нэгж хувьцаанд 2743.8 төгрөгөөр тооцон нийт 144 тэрбум төгрөгийг ногдол ашиг болгон хуваарилахаар боллоо. Хувьцааг аль нэг яам, байгууллага руу шилжүүлэхгүй. Ногдол ашиг хуваарилагдана, 51 хувьд ногдох хөрөнгөөр өмнийн говьд зөв, хэрэгцээтэй бүтээн байгуулалт, хөрөнгө оруулалт л хийгээсэй гэж бодож байна” гэж мэдэгдлээ.

“Тавантолгой” ХК-ийн 51 хувь нь Өмнөговь аймгийн өмч. Харин үлдэгдэл 49 хувийг нь орон нутгийн иргэд болон 23 орны 1900 орчим хувьцаа эзэмшигч эзэмшдэг. Тэгэхээр 51 хувьд ноогдох буюу 144 тэрбум төгрөгийн тал гаруй нь Өмнөговь аймгийг хөгжүүлэх бүтээн байгуулалтын ажилд зарцуулагдана гэсэн үг.

ӨМНӨГОВИЙНХОНД АШИГ ХҮРТЭЭСНИЙ ТӨЛӨӨ БУРУУДСАН ХУВЬЦАА ЭЗЭМШИГЧ

       Харамсалтай нь, байгалийн баялагийг, газрын үр шимийг Өмнөговь аймгийнханд хүртээснийхээ төлөө хувь эзэмшигчид буруудчихаад байгаад л учир байна. Тэр дундаа ганц хувьцаа эзэмшигч ганцаараа буруудаад, буланд шахуулж байгаа нь сонирхолтой байгаа юм. Д.Бат-Эрдэнэ “Тавантолгой” ХК-ийн ердөө 10 гаруй хувьцааг хамаарал бүхий компаниараа дамжуулан эзэмшдэг. Тодорхой шийдвэр, бодлогыг тэр толгой мэдэн хариуцаж гаргах боломжгүй. Үүрэхийг нь чи үүрч, аахилахыг нь би аахилъя гэдгийг араас л орж байна гэсэн үг л дээ. Үр ашгийг нь нийтээрээ эдэлж байгаа ч жижиг “Тавантолгой”-н баялгийг хувьцаа эзэмшигч нэрээр Д.Бат-Эрдэнэ гэдэг хүн ганцаараа идээд уучихаагүй байх. Бүх хувьцаа эзэмшигч, тэр дундаа 51 хувийг эзэмшдэг Өмнөговь аймгийнхан хүртэж байгаа нь хэнд ч ойлгомжтой байна шүү дээ. Нэг талаараа нүүрсний хулгайн хэрэг сүүлийн төрд бугшсан хулгайг үнэнээсээ илчлэх биш, хэн нэгнийг харлуулах компанит ажил юм шиг харагдах болжээ. Түүний нэг нь яах аргагүй “Тавантолгой”-н хувьцаа эзэмшигч Д.Бат-Эрдэнэ боллоо.

Орон нутгийн “Тавантолгой” ХК-д алдаа байвал хувьцаа эзэмшигчид бүгдээрээ үүрэх ёстой. Оноо байвал ч бүгдээрээ үүрэх нь зүйн ёсны хэрэг. Гэтэл хувьцаа эзэмшигчдийн хамтран гаргасан бүх буруутай шийдвэрийг “Ажнай” Д.Бат-Эрдэнэ гэх ганц хувьцаа эзэмшигчид үүрүүлчихээд, “хэрэг” тохчихов уу гэж хардаж байна.