УЕП-оос нүүрсний хулгайн хэрэгт яллагдагчаар татагдан шалгагдаж буй УИХ-ын гишүүн Т.Аюурсайхан, Н.Наранбаатар, Д.Бат-Эрдэнэ нарын бүрэн эрхийг түдгэлзүүлэх саналаа Их хуралд өнгөрсөн баасан гарагт өргөн мэдүүлсэн. Халдашгүй байдлын дэд хороо хуралдаж, тэдгээр гурван гишүүнийг түдгэлзүүлэх нь зүйтэй гэж үзсэн. Мөн МАН-ын бүлэг, Хууль зүйн болон Төрийн байгуулалтын байнгын хорооноос Халдашгүй байдлын дэд хорооны гаргасан шийдвэрийг дэмжсэн.        

       Тэгвэл өчигдөр эдгээр гурван гишүүний бүрэн эрхийг түдгэлзүүлэх асуудлыг УИХ-ын чуулганы хаалттай хуралдаанаар хэлэлцлээ. Уг хурал найман цаг нэлээн ширүүн болсон гэх мэдээлэл бий. Хуралдаанаар УИХ-ын гишүүн Т.Аюурсайхан, Д.Бат-Эрдэнэ нарын бүрэн эрхийг түдгэлзүүлэхийг гишүүдийн олонх дэмжиж, УИХ-ын гишүүн Н.Наранбаатарыг түдгэлзүүлэх шаардлагагүй гэж үзсэн байна.

-ТЭГВЭЛ МАН-ЫНХНЫ ЦЭЭЖЭЭРЭЭ ХАМГААЛСАН Н.НАРАНБААТАР ГЭЖ ХЭН БЭ-

    УИХ-ын гишүүн Н.Наранбаатар Өмнөговь аймгаас сонгогдож, анх удаа гишүүн болсон шинэхэн улстөрч.  Түүнийг нүүрсний гэх хэрэгт албан тушаалын байдлаа урвуулан ашиглаж, бусдад давуу байдал бий болгож, хохирол учруулсан үндэслэлээр яллагдагчаар татан шалгаж буй.

           Түүний төрсөн дүү Н.Очгэрэл нь “Эвт повер майнинг” ХХК-ийг “Хостамга групп” ХХК, “Энбо тайж транс” ХХК-тай хамтран эзэмшдэг. Тэгвэл “Хостамга групп” ХХК-ийн захирал Очирын Оюунбат нь Хонг Конгийн “Anda investment international” компанитай хамтран “Оюут болор эрдэнэс” ХХК-ийг эзэмшдэг. “Оюут болор эрдэнэс” ХХК нь Өмнөговь аймгийн Баян-Овоо нүүрс угаах үйлдвэр барьж буй. Эндээс харахад Н.Наранбаатар нүүрстэй ямар ч холбоогүй байх үндэслэлгүй бөгөөд, хууль хяналтын байгууллага ч түүнийг нь нотлож, АТГ-т шалгаж эхэлсэн талаар бид өмнө нь мэдээлж байсан билээ.

             Тэрбээр “Намайг нэг ч удаа дуудаж мэдүүлэг аваагүй. Би 2016-2020 онд Өмнөговь аймгийн Засаг даргаар ажиллаж  байсантай холбогдуулан миний нэрийг зарласан байх. Би нүүрстэй ямар ч холбоогүй.  Миний хөрөнгө орлого өссөн зүйл байхгүй. Жинхэнэ хулгайч нараа далдлаж байгаа юм байлгүй. Би Х.Мандахбаярыг мэдэхгүй. Өмнөговийн гэх хүмүүс бүгд л холбогдсон байна лээ. Тэр "Эрдэнэс Тавантолгой" ХК-ийн бүх гэрээ, шийдвэр нь дээрээс гардаг. Дарга нар нь ч Улаанбаатарт суудаг” гэж өөрийгөө гэмгүй хэмээн өмгөөлж явсан. Тэгвэл АТГ-аас Н.Наранбаатарын болон хамаарал бүхий этгээдүүдийн гэр болон албан оффист нэгжлэг хийж байв.